A sigurno do sad niste ništa čuli pa ču evo čako napisat o nadolazečemu nevrimenu.
Jema več desetak daan da pojedinci prognoziradu da bi na ovemu našemu području moga past snig,a zanimljivo je da su to ljudi kojiman oto uopče nije posal,nego se sa otin bavidu onako,moga bi reč iz hobija,a dokle su oni oto govorili ovi drugi su ji ismijavali,a evo,kad se bliži oti dan DE,sad su svi navalili,tako da se dobije dojam da se natječedu ko če nas više pripast,jerbo ono ča se more čut nije ni najmanje lipo,uza snig koji bi ovde u nas moga past,dolazidu i niske tenperature,tako da uz buru koja če puvat,če bit=ajme nan i ča se više bliži momenat otega „Armagedona“ to je sve veča panika,a zanimljivo je da su se oti ča sad paničaridu, pri pet-šest daan rugali oniman koji su prva upozorenja svatili ozbiljno,a od oni ča sad trčedu ka muve bez glave dobivali epitete kako o svega činidu mirakule i širidu paniku-paničari,e a ko ji je proglasija paničariman?oni ča ji ja nazivan „u zanji čas“,a to su oni koji sad panično iščedu drva,kupujedu plin,jerbo ako nestane struje da se jemadu sa čin grijat,trpadu u kolica po trgovačkiman centriman sve i svašta,jerbo se svi sičadu kako je to bilo naza šest godin kad je zanji put ovde pa snig,a police u dučaniman su parile ka da ji je napalm pohara,pa se kupuje nafta,benzin,voda,ako se slučajno Jadro zamuti,oli pukne cijev,pa kunpire na vriče,konzerve,more nestat struje i ko zna kad čedu je uspit popravit pa če se pokvarit spiza i bar če bit kunpiri za izist itd.itd.

E sad neznan jeste li me uspili kako triba pratit, znači oti ča sad panično trčedu vamo-tamo,ka muva bez glave,sumanuto kupujedu sve i svašta,su oni ča su se rugali oniman koji su odma na prvu vijest pri šest sedan daaan reagirali i navrime sve riješili, a oni ča su ji „oti“prozvali paničariman, lipo sa strane stojidu i smijedu se oviman ča sad trčedu ka muve bez glave,jerbo su oni sve to lipo pomalo na tenane, ča mislidu da če tribat,obavili,e pa sad ko je tote pravi paničar,oni ča je sve na vrime pripremija ili oni ča sad panično traži di če vazest drva koja se kupujedu ka da je deseti,a ne kraj drugoga miseca i nije bitna cijena,jerbo kako su rekli, oti led bi možda moga i cilu sedmicu potrajat,pa če možda tribat dvadesetičetiriure u komadu gorit,a i boje da priteče,nego da fali,pa se onda kupuje brašno,ko zna koliko če sniga past i oče li se uspit doč do pekare,pusti ti stat, ča je sigurno,sigurno,beštima se jerbo ji automehaničar ne more smistit u satnicu da bi jin bometron izmirija gustoču antifriza…

More se čut,a ča smo mi to Bogu skrivili pa nas sad kažnjaje,priroda se več počela budit,pojedine kulture se nisu još ni od onega lanjskega leda oporavile,nikad u ovi zeman nije bija taki led ka ča ga zovedu,sve če nan ič kvragu itd.itd., a ja ču se samo uvatit ovega da zašto?e to je žalosno ča se još pitadu zašto,a eto zato,kakvi smo nebi se čudija da se jedan dan sa škaljon na nas, odozgara ne počne itat,možda bi jin onda uspilo doč do glaav zašto.

Uglavnon,ča je tu je i svi pričadu o tomen kad če nan počet padat snig,čekaju ga i veliki i mali,virit če se večeras kroza ponistre,a kad če počet nezna se,ustvari zna se,kad se stvoridu uvjeti da počme padat (ajme ča san pametan) uglavnon,pahuljic če bit,a u kolikoj količini ovisi o tome ko če se gori za što izborit,ako prevlada ovi sibirski zrak ča nan dolazi sa anticiklonon,onda če ostat samo na suvomen ledu,a ako se ciklona iz sredozemlja bude sa njon turat i ne dat se, da je anticiklona izgura i nji dvi se budedu kendat,onda se stvaradu pravi uvjeti za da bi ovde u nas moglo lipo zabilit,a sad ča če odo toga bit vidičemo,ali je sigurno da čemo par daan jemat tenperaturni minus čak nas jedan dan po osjetu leda mečedu uz bok sa Gospičen i Karlovcen,pa bi bilo dobro zaštitit ča se da,a pitare sa cvičen,pogotovo sparoge,kaktusiće…meknit u garaže,konobe,utoplit vodomjere,obuč cijevi od vode,ulit i provjerit antifrize u aute,a isto tako na niske tenperature nije pametno dizat ručnu kočnicu,jerbo more smrznit i kad je spustite,ručica se bez problema more vratit doli,a da neznate je li sajela ostala blokirana i pošto su kola i dalje zakočena,pa kad krenete sa auton,grijedu se pakne i počmedu gorit,nisan ni ja za to zna dokle nisan jedan put kad san bija u Doboju vidija da su iz toga razloga na jednoj auti doslovno gorila dva zanja kola.

E, a sad če koko reč, a ča ako san autu ostavija na brigu ili če ga micat kad puše,a lipo,uvalite u brzinu i meknite ispod koli stine,ali nemojte ji pri nego idete krenit, zaboravit maknit,pa ji meknite u porta pak za drugi put 😀 ili, morete digni ručnu pa ča bude,ka da ja moran bit u pravu?
Eto,ja toliko,jedva čekan ote pahuuulje,čuja san da su naši u Kaštila i u Splitu za snig spremni,tako da če bit zanimljivo za oto vidit.
A dokle smo u iščekivanju novega sniga, evo malo slik onega starega,od naza šest godin