Oliver je pokaza svima onima ča mislidu da su ništo, kako je veličina čovika, ma kolika zvijezda bija u tomen da ostaneš uvik oni „mali“,a Split je sa onin ispračajen jučera pokaza koliko se to cijeni.

Jedna ženica,biče jema okolo devedeset godin, stoji tamo kraj Svetoga Frane uza željeznu ogradu,zvizdan tuče,tamo sa suprotne bande nikoj ženi u biloj vešti,je došlo slabo tako da je u tu bilu veštu sela na sri asvalta,a ovu staru ženicu vuče nika cura za ruku,ajde none,ajmo ča,vidi koji je zvizdan upeka,rekli su sad na radijo da je u Split trideset i šest,vidi kako je ona cura pala u afan,nemoj da se i tebi ča dogodi,rekli su likari da stari svit po ovomen ne smi vanka,neka,neka me vrag odnese,ma se ja odavde dokle ne ispratin Olivera ne mičen,mala je i dalje vuče,a ženica se drčavin slabašniman ručican čvrsto uvatila za željeznu ogradu i ne da se…

Puno toga bi ja sad ovde napisa,ali mi je u glavi toliko zbrkano,a i ča ču pisat,jerbo posli onakoga ispračaja kojega je Oliveru Split učinija svaka daljnja priča je suvišna.

Ipak,neka se zna,da radijo Dalmacija več četiri dana vrti samo Oliverove pisme, da je prvi put u Hrvaskoj za Olivera proglašen Dan sučuti, jučera je u Splitu Olivera ispratilo i brecanje bumbala,veeeliko zvono koje je mirovalo osandeset godin,zanji put je brecalo kad je ovon iston rivon odija sprovod za Antu Trumbića.
Da je jučera,ča nije nikad,“gorija“ I sveti Duje sa kojega je razmotan i crtež sa Oliverovin likon,Torcida je napravila špalir,svi su bili u biliman košuljan i majan,kad je tužna povorka krenila rivon niko se probija kroz ogradu i zaštitare i Oliveru na kansil meka šal o Ajduka,cilin špaliron od Svetoga Frane do Kapetanije kroza kojega su posljednji ostaci Olivera prolazili,ljudi su pljeskali,plakali i njegove pisme pivali,upalilo se sedandeset bengalki,koliko je Oliver jema godin,a kad je Olivera ukrcalo na katamaran onda je parilo ka da cili Split gori,sa mora i kopna, sve je bilo u vatri i dimu,svirali su vapori i brodice koje su Olivera iz Splita ispratile ploveči okolo katamarana,kojega su pratile i dvi raketne topovnjače HRM-a,avioni,brodovi Kapetanije i policije,u zraku policijski helikopter i tako mu odali počast za sve ono ča je bija i učinija,a o svega onoga ča san ove dane moga o Oliveru čut,a ti je priči bilo na stotine,ču izdvojit ono kako ga je jedan u tri riči opisa, „Bija je Čovik“.

Ovo o brodican ne triba više niko računat komen je bilo više,ovo od jučera je nenadmašivo i završit ču sa onon izjavon iz Veloga mista,”Ovo je bija sprovod kakvoga Split još nije vidija”.

Oliver je pokaza svima onima ča mislidu da su ništo, kako je veličina čovika, ma kolika zvijezda bija u tomen da ostaneš uvik oni „mali“,a Split je sa onin ispračajen jučera pokaza kako se to cijeni.