U nas se uvik pribaca krivica na one prije,a kad je tako najlakše,evo nikidan upadan u jednu priču o gužvaman iz pravca Kaštili prema onoj takozvanoj dolini semafora u Solinu koja je zajedno sa novon Magistralon sa četiri trake učinjena tamo nigdi za Mediteranske igre,e i sad ko je kriv za ove gužve ča se sada tote događadu,a oni onda ča nisu učinili u dolinu semafora nadvožnjake koji su se još onda spominjali,an tako,znači,to je napravljeno jema okolo četrdeset i pet godin kad su se svi čudili,ma ča činidu ote četiri trake kad je,ča se aut tiče u ono vrime bilo, da si ji moga na prste izbrojit,a zanimljivo kad je,ča se tiče aut u ciloj Hrvaskoj bilo okolo pestoosandeset iljad,a sad ji jema okolo dva milijuna šesto i šezdesetak iljad,ni više ni manje,nego dva milijuna više,a pa sad Vi kontajte koliko odo toga broja jemamo aut na ovo naše,Splisko područje,(bez gostiju)a odonda do dana današnjega,ča se ove širine u Solinu cestovno tiče,kakva je bila,pri četrdeset i pet godin,takva je i dan danas,ali naravno,najvažnije je nač krivca ,pa eto mi znamo da su oni onda,jerbo pri četrdeset i pet godin nisu učinili nadvožnjake,krivi,za ovo ča mi proživljavamo danas.

E i onda se niko napokon sitija da bi i ovi prometni nered,ča jema godinama da postoji,tribalo dovest u red

A sad čemo malo skočit do Kvarnera:
U veljači 2024 godine svečano su otvoreni radovi na autocesti-punoga profila od tunela Učke do Matulji u duljini od deset ipo kilometri koji če bit završeni za tri godine,znači rušidu se brda i činit če se vijadukti-mostovi za da bi se učinile dvi dodatne trake,a ono kad san prolazija tamo radilo se i suboton kasno popodne,a čuja san da su znali i po noči radit,ali nisan po noči prolazija pa to ne mogu tvrdit,ali znan to da smo se Ona i ja pripali kad smo vidili koliko radnikov i strojev jema na ovo dionice od deset kilometri,nima mista di se ne vidi radnik,oli koji stroj.

Solin,siječanj 2022.godine otvoreni su radovi na četverotračnomen nadvožnjaku sa kojin bi se primostila takozvana dolina semafori(Solinska širina)i rijeka Jadro u dužini od 990 metri od čega če most jadro iznosit okolo 500 metri,a to bi za dvi godine tribalo bit gotovo (znači,več smo se debelo tribali po tomen vozit).

Ali,šta se dalje događa, niko se sitija da tote jema ostatak od stare Salone pa se zbog toga mora minjat plan i odgodili su se radovi,ni više ni manje nego do početka 2024. godine,pa onda kad se mislilo da je sve gotovo,niko se sitija da je tote i kip od Isusa kojega je isto tako tribalo maknit,na kojoj lokaciji je posli isto tako tribalo učinit istraživanja,tako da je i ta situacija okolo dogovora o izmištanju kipa Isusa i istražnji radnji iskopi,prolongirala moguči početak radov,na još par miseci.

E i sad se vratimo malo u one godine kad se činila ova širina (ko se ne siča,na sredini je bila Inina benzinska stanica),znači,pri nego se oto raskršče zajedno sa četverotračnon ceston tribalo činit,bilo je na desetke oni ča su metar po metar činili istraživanja iskopin na otemu području i sve se pažljivo kopalo,sa pineliman čistilo, bilježilo,slikavalo i crtalo,tako da su ovoliko vrimena tribali izgubit za to ovi put učinit,je neznan,čudno,a onda ako malo,ali samo malo krenemo u razmišljanje i dođemo do toga da možda u ono vrime i nisu,ili imali vrimena,jerbo je cesta za MIS-a tribala bit gotova,nisu imali mogučnosti i instrumente ka danas,za to sve lipo snimit i u memorije pospremit,a zašto onda prije nego su se otvorili radovi,npr. tamo 2020.g.jerbo se znalo da če se 2022.g.počet radit, nisu poslali arheologe i razno razne stručnjake koji če oto terena pročešljat i sve to završit za da radovi moredu na vrime počet?
A ne,ne,ne ide to baš tako kako bi mi tili da gre,jok.

Ovo je druga najkritičnija točka u našoj zemlji po dnevnoj frekvenciji prolaska aut.

Ma bilo kako bilo,u autan sad za do Splita doč,znamo i po koju uru,pa i više provest,evo meni je nikidan samo od sela do širine tribalo uru i petnaest minuti i to kad san vidija da kolona na staroj cesti počinje nigdi okolo anbulante,onda san iša ceston do kave na kružni tok i več tamo na staroj Magistrali me dočekala gužva,tako da mi je za skrenit doli prema staroj cesti-prvoborcu tribalo više od trideset minuti(e onda se zapitaš jesi li falija,možda bi bilo bolje da san od sela odma staron ceston vozija,ali onda se sitiš one,(nikad nemoj preispitivat svoje odluke,jesi li moga bolje,nisi,jer da si moga,bija bi to i napravija)inače u ovima prometniman situacijama u kojima se redovito,kad prema Splitu gremo,nađemo,svako od nas misli da je najpametniji i da če baš tamo di on ide najbolje proč i najbrže doč,a na kraju vidiš da odo toga nema ništa,iša vamo,oli tamo,svede se na isto,svugdi su gužve,jerbo svi slično razmišljamo,pa tako isto i razmišljamo oba tome,zašto oni koji to moredu učinit,npr.nisu ništa napravili po pitanju poboljšanja-češči odlazak i dolazak takozvanoga metroa i na oti način kroz ove godine smanjili gužve na cesti,jer bi evo ja prvi,kad gren u grad sigurno u sedandeset posto slučajev to učinija vlakon,a ne auton,a puno ji isto razmišlja i eto smanjenja gužve na širini.
Bilo kako bilo iz ove kože ne moremo,strpimo se još malo,govoridu da bi u šesti misec dogodine ovi radovi u Solinu tribali bit gotovi,a mi se samo moremo nadat da če to tako i bit.

I na samomen kraju,recimo da če nas ovi nadvožnjak oslobodit gužvi,(valjda ji neče turnit devesto metri dalje),ali šta če se dogodit kad bude otvoren tunejal kroza Kozjak i promet sa autoputa bude prolazit kroza Kaštila,jerbo kako znamo oto su nazvali novin ulazon u Split,pa se opet nameče logično pitanje,a zašto se najpri nije krenilo sa izgradnjon mosta od Kaštili put Splita,kad se odma u startu zna da če nan novi ulaz za u Split u Kaštiliman učinit rusvaj,a to svi znamo osin oni koji bi tribali znat,a pari mi se da činidu fintu ka da neznadu,ali nema veze,kako govoridu tunejal če za Kaštila bit spas,a za one ča jin je upitnik nad glavan kad oto čujedu,evo ja ču provat objasnit,a kad oto tunela otvoridu i putnici namirnici sa autoceste zamisto u Dugopolje,jer jin je tamo dalje,se spustidu u Kaštila na Magistralu(novi ulaz u Split) i učine se prometni čep,mi čemo lipo učinit suprotno od nji,za poč u Split,za razliku od nji mi čemo vozit put zapada,praznon ceston i mavat oviman blokiraniman ča gredu put istoka i lipo čemo iskoristit blagodati novootvorenoga tunela,popet se put uzgor,proč kroza njega,uč na autoput,sač u Dugopolju i onda put doli salazit novon ceston ča gre put onega kružnoga toka sa semaforiman,ali mi čemo i to izbječ,pa čemo se prišaltat na novu zaobilaznicu(valjda če do onda bit gotova)ča gre priko Karepovca put TTTS-a i lipo odo tamo uč u grad Split,e…

A zaobilaznicu Split Omiš o kojoj se govori jema i više od trideset godin i ide puževin korakon,neču niti spominjat

A ovo je doli na Kvarneru di se čini ota nova cesta: