Je,je,čulo se danas puno “lipi” besid nakon ča je od velike kiše i ono vitra pala ova jedina jedna murva ča je  ostala na našemu pazaru,a di neče,potkopalo joj je žile,a ostavilo jedro (čitaj krošnju)od jednu sedandesetak kvadrati,isto ka da na temelje od kokošinjca napraviš neboder,a eto,iznenadila ji je kiša,malo je potopila okolo,a i nije zeman od vitrov,pa je ka normalno da se je otoliko stablo tako nezaštičeno ostavilo,je,je,vidi se da nan Grad jema veeelike stručnjake za botaniku,agronomiju,holtikulture,piladu se grane sa stabal kako i kad  komen padne napamet,večinon tamo u treči četvrti misec,pa se onda spominjala i Maja Erceg,koja je bila najsposobnija osoba po tomen pitanju ča je Grad jema i koja je cilo vrime bila na terenu sa radniciman i nadgledala i na licu mista govorila kako bi to tribalo napravit,ali ne,ona određeniman nije valjala,pa su je makli,biče jin kvarila prosjek,dobro i kvalitetno je radila,a o onomen ko dobro radi svi lipo govoridu,ali, di san ja tote,mene je istisnilo,za me se ne čuje,a triba to prominit i evo kad na taki način greš onda se moreš nadat i vakiman rezultatiman, pa je oplelo i po petomen katu,bolje da svake četiri godine minjadu glasnogovornike,a ča oni od prije nisu glasno govorili,a i moga se bar koko od nji danas ovde pojavit,a neš ti,ovo je ipak jedno obično stablo,a ka malo su ji kroza Kaštila potaracali i čulo se danas još i to da se u kuolariman spominjalo kako ovo stablo smeta,ali da se ipak odo toga odustalo,ča če nan,pritiču nan,malo ji je ovo lito izgorilo,a zanimljivo je da oni koji zapali mora odgovarat,a ovo ča je radi potkopavanja murva pala, jer se nije osigurala-sidrila,učinila kruna okolo stabla,okinila krošnja…nikomen ništa,neš ti,sad če se objasnit,vidi ji učinili su odo toga dramu…

Ovo gori san ono sve ča san danas čuja “obuka u celofan” jerbo bi cilo vrime čitali samo ono bip,biip,biiiip.

E moj čovik,odavna nisan vidija da su Sučurani bili ovako jidni i to muško žensko,staro,mlado,sve je danas slavalo kvragu i ovega i onega, govoreči u ovakomen i nakomen kontekstu…A puno svita je danas tote bilo. I to su,zanimljivo, svi došli radi nikoga tamo stabla?

I ča sad napravit?

Ja znan,a kad san to reka kraj stabla naglas onda su niki manili rukon,ma vidi luđaka,a lipo mi je ovi ča san ga pita i reka da če budale tako reagirat,(ali je ipak večina zato da triba ništo provat napravit)a pita san čovika koji se u ovo tendi,jerbo kad se u ništo nerazumin onda uvik pitan onega za kojega znan da o tomen zna više od mene.

I ovi mi je lipo objasnija,reka je  da se neče služit stručniman izraziman,nego če mi objasnit tako da lipo svatin i kad napišen da i oni koji pročita isto tako razumi.

Znači imamo stablo koje se nagnilo,kako vidin večina žil je ostala na drvetu,nisu pukle,a i trečina nji je sa sjeverne strane još u zemlji,znači ima nade,dakle, triba skinit ovu krošnju,ostavit osnovne grane koje na određenu miru triba skratit,pažljivo iskopat rupu,ako triba i mašklinima,da se ne oštete ove žile koje su u zemlji i takvo deblo pomoču sajele vratit nazad,ne kašikon od bagera ili sajelu namistit da se ostruže kora,ove stine šta su okolo žil maknit ča i donit kvalitetnu zemlju,ispilaniman granama zacilit rane… Reka je on toga još,ma ko če sve zapantit.

Ovo san ti ja sad ovde na brzinu reka, Grad,kad več nije poduzeja radnje predostrožnosti,pa da se ovo ne dogodi,onda neka sad plati stručnjake koji če nadzirat i govorit kako i koje radnje je potribno napravit pa da se ovo stablo spasi, triba sve provat,a ako ča krene krivo,uvik ostaje solucija za okinit ga, a dovoljno je bilo smanjit krošnju,je da se sada to ne radi,ali eto,neke stvari se moradu napravit,jer ako se ne učinedu onda se dogodi,evo ovo ča sad vidimo.

A šta če oni sad napravit ko zna, ma siguran san da če struka ka i dosad,ča se stabal tiče donit stručnu odluku!!!!

E,a več vidin mudrijaše koji čedu reč, da lako je sad bit “general posli bitke”,ma nije tako,generali moradu učinit kako triba posal pri bitke,pa da se posli ote bitke ne priča zašto to nije moglo bit vako nego nako,a da kad stručnjaci napravidu posal kako triba i posli nima nikakvoga,ja bi bija vako,oli nako,pokazali su nan generali koji su do u tančine osmislili i razradili akciju “Oluja”.

I na kraju,ova i one murve ča su ji potaracali kad se radilo okolo temelji razrušene crkve,su posađene tamo okolo 87-88 godine,zaminile su se one od prije koje su izgnjijale,a tin potezon se obilježija memorijalni prostor oko starega kanpanela i po prvi put je na ploču stavljen vijenac kojega su položili trojica tada živučih, koji su priživili  bonbardiranje.

An pače,čulo se danas i o tomen kako se ovde zatvorija promet,a ništa nisu nisu ponudili ka kvalitetnu zamjenu i da bi ovde opet tribalo pustit da prolazidu aute itd. itd.

Znači ovoj i oniman murvan od prije nima stotinjak ili sedandesetak godin ka ča se danas govorilo.

Evo ovoj isprid pekare jema stotinjak:

Ovi pas ča ga vidite gori na slici je vuka kabel koji je bija pod naponon,a puka je jer je na njega palo stablo.

I danas se okolo pazara skupilo krcato svita i uz beštimlje i ne tako lipe beside o oniman doli u opčini, pratilo pilanje omiljenoga stabla: