Panika danas na Sokolani (stavljene slike od kanala)
Danas okolo deset i deset na Sokolanu među kupačiman je bila velika panika jerbo su iz onega potoka ča izlazi tika uza plažu kako mi govoridu očevici (biču fin) počela izlazit govna (ka i nikidan i to mi ovi govori +- koja minuta,okolo iste ure ka i danas) i matere su brzo vadile dicu iz mora vanka i beštimalo se u svi šesnajst,a kako su mi rekli odma se je alarmiralo opčinske službe ka ča san i ja zva za vidit ča se da učinit,a čovik je isto tako sve napravija ča je u njegovoj moči i alarmira one ča su navr njega.
Uglavnon ovde triba na brzinu reagirat jerbo ka ča morete vidit na slikan (bocu od cidokora) iz ovega kanala jema bit svašta izlazi,a izlaz je tika uza plažu koja je krcata svita sa malon dicon (vidi sliku) i to od onega stranega i svi stran lipe naše,tako da puno puti oti razni jezici i dijalekti znadu bit u večini u odnosu na nas domače,pa da nebi opet dogodine ka i ovu godinu, kukali kako nan je u odnosu na ovu godinu opet pa broj gostiju,jer nije niko lud pa če se doč kupat tamo di če se infetat,a s ovin danas šteta je več učinjena,ne virujen da če se ovi ča su danas oto vidili više pojavit na ovo misto.
Puno nji se pita okle ova pusta voda iz ovega kanala? A znan da je tamo u Doba mraka kad je jugovinil radija tote izlazija inberlauf-višak vode ča ga jugovinil nebi potrošija pa bi diko tuta force ka danas odila,diko upola manje,a diko je skoro pa nebi ni bilo,ma mi sad nije jasno o čemu se tot radi?jerbo jugovinila odavna nima,a nije vrag da je to oni isti inberlauf i da voda iz vodovoda cilo vrime u ogromniman količinan gre u more?,a ako je i koliko je gre onu gori stranu navr Magistrale,ako ne cilu polak bi se sigurno dalo s njon namirit. Znan da bi sad okolo ovega mogle nastat peripetije jerbo su ovi svi kanali i potoci u ingerenciji Hrvaski vood,ma ništo hitno triba učinit,jerbo nima vrimena za prepiske koje se znadu protegnit,bar nan je ovde tako bilo objašnjeno kad je u pitanju oni potok u Blatima . Možda da Grad ide u pregovore da če on riješit problem tako da bi napravija spremnike i ovu vodu koristija za navodnjavanje zeleni površin u selu na koje se potroši lipo vode,ali ima ništo ča se odma da učinit,a to je da se navr dvorane di ota voda izlazi vanka zamisto prema doli kroz cijev, ota voda usmjeri kanalon koji je napravljen sa gornje bande jugovinilove štrike koji je baš zbog toga i učinjen i kanaliziran tamo u more uza istočnu žicu od jugovinila.
To je rješenje koje je izvedivo u najviše tri dana,triba samo očistit ovi sjeverni kanal od smeča začepit rupu ča gre prema doli i voda če ič kanalon koji je zato i napravljen i izlazit če sto metri dalje nego sad.
Inače san mislija pisat o ovemu potoku jerbo se puno nji bunilo kako je tote more i par stupnjev ladnije nego tamo sa južne bande,kad evo sad ovo.
Na ovoj doli slici di je bila točka je otvor di voda izlazi:

Na ovoj doli slici je to sinjano bilin kolunbaron:

A na ove tri doli slike se vidi boca cidokora ča je doplivala iz kanala i sad se lipo kupa.E.

DRUGI DIJAL:
E ovo je misto di se more preusmjerit voda da zamisto da gre na plažu,kanalon more stotinjak metri dalje:
Na slici vidite kako je stavljen ovi zid ča san ga obiližija su dvi bile točke koji kad ga prije nije bilo onda je voda odila dijal ovin kanalon koji bi diko bija pun do vrja,a manji dijal kroza ovu cijev ča gre do plaže,znači da bi se oti zid triba maknit ili po sredini njega učinit rupu da voda more ič,isto tako iza ovega zida ništo se radilo da voda gre direktno doli tako da bi tribalo gori nalit malo betona da ota voda zamisto doli gre gori i to je cila mudrolija ča se ovoga mista tiče. Inače ovo se radilo onda kad je tribalo cijev od vode primistit zbog izgradnje dvorane i odonda cila voda gre kroza ovu cijev,a ne kanalon.
Na oviman slikan se vidi kanal koji je predviđen za odvodnju vode:
A na ove dvi doli slike žutin kolunbaron je sinjano di oti kanal gre u more:
A sa ovon zanjon slikon tija san dočarat kolika je udaljenost toga mista di gre u more u odnosu na plažu:
Dakle,rješenje postoji,brzo i efikasno,sve je tot,samo triba zasukat rukave!
Za sada nima loženja takozvanoga krutoga goriva iz otpada

Upravni sud danas je donija odluku o poništenju rješenja Ministarstva zaštite okoliša koje je bilo izdano o prihvatljivosti prihvata,privremenoga skladištenja i loženja krutoga goriva iz otpada u cimentarama Sv.Jure i Sv.Kajo tako da je predmet vračen na ponovni postupak,a za dobivanje novoga rješenja tribat če se ponovit konpletna procedura. Drugon presudon ukinuto je rješenje Ministarstva zaštite okoliša o objedinjenima uvjetiman zaštite okoliša za sve tri cimentare jer Ministarstvo nije uzelo…
Otvori ...Sinjski alkari na Spliskoj rivi

Danas popodne su od zapadne obale pa do rive povodon ovogodišnje 300 Alke prodefilirali Sinjski alkari na konjiman pračeni sa svojiman momciman,Sinjskon latenon glazbon i Klapon Sinj koja je pivala na pozornici i izazvali pravo oduševljenje među Spličaniman i turistiman koji su to sve lipo slikali,snimili,selfirali i odma sliku poslali na sva četiri kantuna Zemljine balote. I ča če ti bolja reklama.E.
Otvori ...Sramota (ll)

Tamo nigdi u prvi misec pisa san text pod naslovon “Sramota” kad san proša kroza Veli Varoš i vidija spomen ploču ča su je Velovarošani mekli za poginule borce koji su u Domovinski rat krenili iz Spliskoga Varoša u koji se više nikad nisu vratili.I to nima puno texta,a sve je rečeno:“OTIŠLI STE IZ VELOGA VAROŠA PROŠLI HRVATSKOM I POGINULI ZA NAŠU SLOBODU” (pa je onda napisano sedan imen poginuli)…
Otvori ...Iljadu baluni za Juraj Bonači

Sinoč na Spliskoj zapadnoj obali u devet manje kvarat poletilo je iljadu baluni za koje su se davali dobrovoljni prilozi od koji če se kupit rampa za potribe štičenika Centra Juraj Bonači odjela Firule. Ka i puno puti do sad i jučera su Spličani pokazali veliko srce i oti iljadu baluni razgrabilo se u samo par minuti tako da su organizatori jemali problem, jerbo se tražilo još baluni,ali ji više…
Otvori ...A jesi li vidija? Vidi ono…

Cilo jutro kroza selo se moglo vidit kako se upire prston i govori,a jesi li vidija kako dimi? A jesan vidija san. A kako ništa nisi napisa,a vidin ja da se i ti ka makako okričeš. Ajde kvragu ti,makako,okričanje,iskričanje, dimovi,fumari… Čekan,a ča čekaš,a čekan razvoj situacije. A ča se to još po tebi triba razvit,pita me ovi drugi? A čekan da se razvije,bip, pa če onda bip,biiiip na onemu drugome…
Otvori ...Danas je prvi dan lita

Danas popodne u osamnajst uri i trideset i osan minuti nastupilo je lito. A reče koko je lito,red sunca,red oblakov i eto odma se uvati sivat i grmit i počme padat kiša,nezna normalno,nego pari ka da če se nebo na zemlju srušit,pa je nikidan more bilo dvajstičetiri,a danas je dvajstijedan,puše bura i ono ča uđe u more kad izađe vanka brzo se umota u šugaman jerbo mu se dlake nakostrešidu…
Otvori ...A vidi “ovo”

Jema par dan da se u selo,tamo kraj Đardina more vidit parkirana ova neobična žuta auta od firme Cimos. A dica,oni malo starijiji od dice,a more se slobodno reč oni do četrdesete godine života upiredu prston,a vidi “ovo”,a neznadu da pored fiče,tristača,pezejca,… u “ona” vrimena ovakva auta je bila naša svakodnevnica na cesti. A Luka,ponosni vlasnik ovega popularno nazvanoga Spačeka kojega je do u detalje u originalu lipo ušestija sa…
Otvori ...3 D Street Art Festival u Splitu

U petak je počelo,a u nedilju sve okolo podne završilo,a zove se 3D Street Art Festival u Splitu,a za one ča neznadu šta to znači onda ču pojednostavnit pa reč da se ova vrst umjetnosti zove Anamorfizam ča oče reč da je ovo bilo crtanje suvon pastelon na ulici i to tako da postoji određena točka od koje se vučedu linije i kasnije kad je oto sve gotovo slika se…
Otvori ...
















Komentiraj