Odma u startu ču oba tomen kako se voli reč da je Turska vakva i onakva država,pa onda joj nakalemidu razne epitete,a mi koji smo u EU volimo reč kako smo mi sređena država,a zanimljivo kako Turska,ka taka nije primila oto broda sa kojega se moradu skidat oti paneli punjeni sa azbeston,jerbo je nigdi ispliva podatak,da oni po zakonu,ako je  više od pedeset ton,to ne moredu činit,dok oti tristapedeset ton ča,kako se govori,sa otega broda triba skinit,u nas bez problema moredu oti posal učinit,a pa se sad nameče  logično pitanje, pošto se radi o impresivnoj količini od oko 350 ton otega azbesta,je li to znači da mi nimamo nikakva ograničenja po tomen pitanju,pa da je bilo toga i milijun ton,to bi opet bez problema prošlo?Zašto je jedna Turska to limitirala,a mi nismo?

Kriv je Debeljak,molim,kako san ja svatija to se sve radi prema postoječiman zakoniman naše države,brod je doša iz strane države ovde u nas,ko ga je pustija,brod bez posade kojega je teglija remorker bija je par daan u Bračkomen kanalu,kako,a je li mi to mislimo kako je brod doša u Spliski Škver na skidanje oti paneli između koji se nalazi azbest,a da niko u vrju vlasti nije zna da če doč,a dobro?

A šta se tiče Debeljaka-vlasnika škvera,on čovik radi da zaradi,a radi ono šta mu je niko dozvolija da radi,jer kako vidimo sve je to ča če se radit regulirano zakonon,reče koko,da baš i nije,a kako nije,da nije onda ti brod sa otoliko otega materijala nebi moga ni doč ovde,ka ča nije moga ni u Tursku.

I na samomen kraju,najjači su mi oni ča su slikavali oto broda i na društvene mriže mečali sliku,e i pa ča onda kad ste je mekli,ča to znači kad ste je mekli ili oni ča pišedu ili po šentadan i kavičiman govoridu tribalo bi ovo,tribalo bi ono,odo toga ča bi tribalo nima ništa,da smo nas par,zamisto da smo krenili u prosvjede protiv užižanja šveleri,erdeefa i ostali čudi,tako reagirali,danas bi ko zna ča bilo,pa se onda more čut,nije to baš kako ko misli da se more,tilo se učinit blokadu sa brodican,a pa je bilo da triba dat imena i prezimena,brojeve brodic… i na kraju,ča se moglo vidit,onega jednoga ča je plovija blizu otega broda koji je u ime protesta upalija svoju brodsku sirenu.

A recite Vi meni da se stvarno tilo oto broda fermat,a oli se nije moglo sa luftičiman,exploreriman,razniman daskan,moglo se kajtat,vozit se tote sa kanuiman…,fala Bogu toga svega prid početak lita budedu puni dučani i sve se isprazni,znači,uvik postoji načina ako se oče,ali,je li se oče,opet ču se vratit na početak…

I na samomen kraju,pitadu me da ča ja o svemu tomen mislin kad je glasnogovornik iz Škvera reka da nezna  di čedu sa otin azbeston ča ga oni budedu skidat,a ma dobro je čovik i reka,oni jemadu posal za oto skinit i pridajedu ga firmi koja jema dozvolu za sa otin dalje manipulirat,da kako ja to olako,a može se dogodit da to završi vamo,pa da završi tamo,a ma neču niti spominjat ča komen pada na pamet di bi oto materijala moglo završit,a onda san ovemu jednomen ča mi se popeja na glavu reka,ama znaš ča,kad je več vako, ama je..me se,ako če sad svaku ploču ča je skinedu meknit u katapult i poslat je nama u selo,a da se sa menon ne da pričat,bla.bla.truč,trač,navija se ka brekelica,pričaj ti sa menon pričaj,stavi sliku na društvene mriže,napiši ajme i misi da če ti koko drugi riješit problem,(ovo problem-mislin na opčenito)aha,oče,oče,kako neče!

Na ovu doli sliku se vidi kako ga remorkeri okričedu,pa su ljudi mislili da ga vračadu nazad:

A onda razočarenje,okrenilo ga je da bi ga u škver mogli sa krmon uvalit