Fala @iskrenome na videju

Jučera,na Sv.Stipana se održalo dvanajesto po redu Sučuraško turanje kariči. E i sad, zamisto da ja sa onin texton od lani lipo sad ovde učinen copi paste,ne,nego ga ja sad moran opet iz glave činit jerbo se dogodilo ništo ča sad ovde triba objasnit kako je to u stvari zapravo bilo,jer u selo več kružidu razne varijante i varijacije sa umetnutiman devijacijan koje nas tribadu odvest puuuno daleko od one prave istine,tj. situacije koja se jučera dogodila dokle su se kariči turali.

Jučera nakon ča je utrka završila oni posjetitelji ča su bili kraj cilja počeli su odma vikat kako je utrka nepravedna i kako bi lentu pobjednika tribalo dodjelit oniman ča su u cilj ušli drugi,a oviman prviman dat drugo misto. A ča je sad? Kako san ja bija sta vamo kraj stare škole uopče nisan vidija ča se to sve na cilju događalo,a događalo se puno toga,ča san kasnije vidija i na snimci o @iskrenoga di se vidi da su ovi ča su osvojili prvo misto,a po svoj prilici bi po snimci završili na drugo misto priprječili put oniman ča su osvojili drugo misto,koji bi gledajuč snimku ovi put bili osvojili prvo misto i tako,pošto su ovi ča su ka rečemo “zasluženo” osvojili prvo misto vidili da bi ji ovi ča su osvojili drugo misto mogli prič i oni bit na prvo misto onda su ovi ča su osvojili prvo misto pripječili put oviman ča su osvojili drugo misto,tako da su zadnji desetak metri ovi ča su osvojili drugo misto utreso ugurali u cilj ove ča su osvojili prvo misto tako da je publika ča se tote nalazila i sve to vidila popizdila i počelo se odma beštimat,vikat kako je utrka neregularna,triba oniman drugiman dat da su prvi itd.itd.,a pošto je fala bogu bilo jednu miljun kamer odma su se išle vrtit trake i tvrdi diskovi za vidit ča se to sve u utrci događalo,pa je Zagor nakon toga zaključija da bi bilo najbolje ote dvi posade od kariči sest za isti stol i s njiman popričat,pa je tote bilo i malo žučnije rasprave di se moglo od ovi ča su osvojili drugo misto saznat da se i doli nigdi okolo banane događala slična situacija,ali je doli bilo široko pa su je izbjegli,ali je zato sve kulminiralo gori,isprid cilja di je bilo u tisno i dogodilo se to šta se dogodilo,za da bi se ovi ča su osvojili prvo misto pravdali kako ovde nima nikakvi pravili i po tomen u žaru “borbe” je sve dozvoljeno za doč do krajnjega cilja,a šta češ sad posli ovoga?recimo da su i oni u pravu,kvragu i fer pley,nima pravili po kojiman se triba ponašat i moš onega drugoga i satrat za da bi ti prvi doša na cilj? E,a zato je ovo “škola” i za sljedeču godinu če se svakomen od natjecatelji prije nego se započne sa utrkon turnit karta sa pravilimanu ruke koji ako se ne budedu pridržavat sljedi diskvalifikacija,a možda i na stazi bude kakvi promjen,ali o tom po tom.

Na oviman doli slikan morete vidit raspravu za stolon i slike sa kamere od @iskrenoga na kojima se vidi kako je to bilo na cilju:

I eto opet su oni koji su amo reč “zasluženo” pobijedili ostali prvi,a ovi drugi,drugi,a za ubuduče če se prije svake utrke sudioniciman podilit pravila ponašanja koji, ako se ne budedu pridržavat sljedi diskvalifikacija ( dosad je jedino jasno i glasno pravilo da se na obilježenomen području isprid staroga kanpanela ne smi vozit ,nego oto misto pritrčat sa kareton ispod ruke.Tako je pri dvi godine jedna ekipa diskvalificirana jerbo je zamisto pritrčala priko toga mista vozila.

A da je ovo posta opče poznati događaj u Hrvaskoj pokazatelj su kamere od razni televizijski kuuč,a potvrdu tome dala je i HTR koja je sinoč u glavnomen dnevniku ovoj Sučuraškoj manifestaciji dala okolo tri minute prostora,a zanimljivo je da sama utrka traje okolo pet minuti i čudo svita dođe to pogledat i smisti se uzduž Kajinoga briga,a kad ga ovi sa karičiman prođedu onda svi,staro,mlado,muško,žensko,sa dicon na rameniman i u koliciman trčedu na drugu bandu,tamo kraj pošte i stare škole za dočekat ji kad budedu dolazit na cilj,a oti fenomen niko ne more objasnit.I kad se utrka završi onda se najedanput sve rasprši ka da ništa nije ni bilo,ali zato se o tomen priča,ka ča če se i sad,daniman pričat i objašnjavat ča je i kako je to bilo i jeli moralo baš tako bit.E.

Bravo Zagore! I dok su ti,(a i danas isto tako jema pojedinac koji ti podmečedu noge) ti si uporno i dalje ovi projekat gura i doveja ga do toga da se o njemu na daleko priča i sa svojon upornošču uspija si učinit da se i za naše ovo malo misto i po nečin dobrin na daleko čuje i usput,razniman parazitiman i ostaliman bip,biiip bip koji “upravljadu” iz kafiči pokaza kako se voli Sučurac.