Šta je to takozvana Ajdukova “kvaka 54”
A to je da u ove tri utaknice,sa Cibalijon ča je bila nikidan,Dinamon ča če bit u nedilju i sa Osijekon ča če se igrat tamo u peti misec, triba dostignit brojku od niki pedeset i četiri iljade gledatelji i nadmašit rekord sezone 98’99’ godine. U sridu je to sa Cibalijon bilo okolo 15 iljad,sjever je za nedilju rasprodan još od jučera,danas je nestalo istoka,a samo je pitanje uri kad če planit i zapad,tako da če u ove dvi utaknice bit okolo četrdeset i pet iljad,a naravno,s obziron na dišpet,niko ni ne sumlja da če se oti rekord nadmašit,jedino ako se koko ne siti koje pametne kazne,pa da se utaknica sa Osijekon odigra sa prazniman tribinan.
Inače ona utaknica u sridu ča je bila sa Cibalijon je ništo ča se u nas na balunu sigurno nije nikad dogodilo,da je oto išlo petnajst iljad ljudi gledat,a biče su se oni bidni iz Cibalije kad su vidili ovoliko svita na tribinan pripali,pa su zato i primili četiri gola? Usput,da ne zaboravin, sjeverne tribine su zbog kazne bile prazne,pa je Torcida bila na zapadu,a taman oni dan kad san iša kupit karte mislija san se vazest zapad,pa mi je mali reka da zapad kupuje Torcida,ma kako zapad,kad sa pretplaton jemadu mukti istok,a eto,ide se na zapad,a dobro,onda čemo mi suprotno,da ji moremo bolje vidit.
Na ulaziman je bila tolika gužva da je parilo ka da je koji derbi,a oni ča su pritraživali ko ča nosi sa sebon, toliko su bili detaljni da su mi mala i ona-Maja,tek nakon dvajstipet minuti nego ča su tinbrali kartu uspile vidit nji dvajstidva ča trčedu za onin mijuron,čak je u međuvrimenu pa i gol,ajme grinte,kako bi koja ženska osoba bila gotova, tako je spuštala sve po spisku,a bilo je i oni duhoviti,asti ča su temeljiti,pari mi se ka da mi je učinilo ginekološki pregled,pa je bilo oni kad su vidili kako muški to expres reješajedu,dobrovoljki, koje bi da ji muški zamisto ženske, pritražijedu,a naravno,ništa bez Istanbulske,pa je bilo i oni koji se osječadu ka ono i pitanji, da ko če nji pogledat,a u boršan se moglo svega nač,od pinceti,rimeli,šminki,labeli,ogledali,nožic…,pa bi bilo dobro da oni koji če poč na stadijon u nedilju odma to sve lipo doma ostavidu i ča manje vrimena izgubidu na pritraživanju,jerbo če to i onako bit cirkus,ako se npr. u sridu,na Cibaliju čekalo po četrdesetak minuti za samo doč do onega aparata ča tinbraje kartu,plus dvadesetak minuti za pritraživanje(žene),a onda moš mislit kako če to bit u nediju na duplo više svita.
Biciklistička utrka Tour of Croatia danas je prošla kroz Sučurac
Današnji dijal etape je bija i prolaz kroz Kaštila.Iz Trogira su krenili na uru i pet,a kroz Sučurac su prošli okolo dva i deset,dok jin je krajnji cilj današnje etape vrj Sv. Jure na Biokovu.
Otvori ...Nije čudno da je neko nekome pomoga,več je čudno to,da se ljudi zbog toga čudidu
Da je sve išlo kvragu to več odavna znamo,ali da da je to moglo poprimit tolike razmjere,a svi se prikažijedu pobožniman,e to je več problem. Ovi daan smo svidoci kako ribari na rivi krpidu mrižu,ali selo ka selo,ne more bez priči,pa tako i sad i to u čudu, govoridu, da ča če ovo sud svita,jerbo Brbini pomažedu Tuntiniman krpit mrižu?? Ma čekaj malo,ča je to čudno? Oviman se raskidalo ni…
Otvori ...“Quattro aprilanti, quaranta duranti
Danas je oni dan u godini za koji se, ča od mali nog znan, govori ona narodna talijanska, “Quattro aprilanti, quaranta duranti” ča oče reč da triba pratit kakvo je vrime danas i da če nan tako bit četrdeset daan,a ima i druga verzija,a ta je da sa današnjin danon završava četverodnevno razdoblje koje bi nan tribalo bit naznaka o tome ča nas od vrimena čeka u sljedeči četrdeset daan.Reče…
Otvori ...Uskršnji koncerat KUD-a Putalj
Sad bi se več moglo govorit i o tomen da je ovi događaj ča se več treču godinu na Uskrsni ponediljak održava, posta tradicionalan. Bila je to ugodna večer u kojoj su pivači, plesači i svirači sučuračkoga KUD-a Putalj pokazali svoj veliki napredak,jer postojidu tek tri godine i od početni tridesetak,naresli na respektabilni stodvadeset članov, koji radidu u sedan sekcij u kojiman ima mista od oni najmanjega uzrasta,pa do oni…
Otvori ...Sve više je šuškanji po selu da če se počet sa radoviman lučice na Sokolanu
Ono ča ja znan je to da su se polovinon prvoga miseca tote pojavili đometri,investitor,vlasnici parcel koji graničidu sa sadašnjon i budučon lučicon,zainteresirani miščani… I znan to da postoji projekat na osnovu kojega je grad Kaštila izda lokacijsku dozvolu sa kojon se kako je rečeno,po novomen, more počet sa gradnjon,ne triba građevinska,pita san mogu li je slikat da svit zna i više ne nagađa oče li i kako če to…
Otvori ...Napokon se niko sitija oplemenit oni doli prostor od Gospojske štrade i Biskupove palače
Veliki petak
Danas je Veliki petak, krščanski dan spomena na Isusovu muku i smrt. Na Veliki petak se ne slavi euharistijsko misno slavlje,na oltaru nema križa, zapaljeni šterik cviča ni ukrasa kako bi se pokazala žalost i suosječanje sa Isusovom mukom,održavaju se tradicionalne procesije. Na današnji dan je obavezan post za osobe od 18 do 60 godin,a za one starije od 14 godin je obavezan nemrs. Na veliki petak i subotu (neki…
Otvori ...Danas je Veliki četvrtak
Prvi je to dan Svetoga trodnevlja i spomen dan Isusove posljednje večere na kojoj je Isus bija sa svojiman učeniciman i na kojoj je ustanovija Euharistiju i svečenički red tako da je to bilo prvo svečeničko ređenje prva Sveta misa i prva Sveta pričest. Isus je reka,ovo je tijelo moje i kruv se pretvara u tijelo Isusovo, ovo je kalež moje krvi- vino postaje Isusova krv posli toga Isus reče…
Otvori ...
Komentiraj