Jema nikoliko daan da je spomenik poginuliman braniteljiman doli na rivu osvanija opasan žicon i naravno,kako to več u naše selo gre,uvatija me ovi jedan,a ča je mučiš,a,a ja ga gledan,neznan o čemu se sad radi,a jesi vidija ča su učinili sa spomenikon?pita mene ovi,a kojin spomenikon? a onin o branitelji isprid Bobisa,a ča,oli su ga napokon podigli da nije na podu? je,je i više su vrimena potrošili,opasali su ga sa žicon,ma kojon žicon?a oli neznaš ča je žica,mekli su okolo žicu o kojoj cilo selo govori i išli mi vidit i jema san ča,zabilo je nikoliko stupi i stvarno, okolo spomenika rasteglo ka niku mrižu,a ma je li se ovo koko šali,pitan ja ovega?ovo su oni zamisto da napravidu kako triba sad žicon opasali i mislidu da su riješili?

A sad recimo npr.da ovo ča su učinili ne izgleda nakaradno,a bi li mi koko objasnija kako če se stari ljudi koji ovde dođedu upalit šteriku,nagnit priko ove žice,ča se koko od nji sad triba ovde slomit?a kako če dotaknit ploču i ime svoga diteta? samo eto pošto izgleda nakaradno,mislin da ovo triba ča pri maknit.

I ovo je niko naša ka rješenje za sredit problem o kojemu san 13.07.2017g. evo ovako pisa:

Sramota,poginuli branitelji ovo sigurno nisu zaslužili

Nakon dugi peripetij,oče-neče spomenik poginuliman braniteljiman u Sučurcu je, sad če u osmi misec dvi godine,napokon i svečano otkriven,a neki su več onda pretpostavili, upravo ono šta se u ovi dvi godine oko spomenika događa.

O holtikulturalnomen uređenju nebi,sramota.

Ovde ču o nečemu drugome,ka ča san več gori spomenija kako su neki odma u početku kad su vidili kako je spomenik nisko,predvidili, ka ča se to i događa da če pasi kad jin dođe, tote dignit nogu i učinit potribu,a ima toga još,dokle matere sididu u kafiču dica se po spomeniku penjedu i oko njega se igradu itd.itd.itd.itd.

Neču više duljit, sa ovin ču završit, jer ko zna ča bi sve moga napisat,moredu se sramit svi oni koji bi o ovomen tribali,a ne vodidu računa,a zanimljivo je da kad jin triba za iskoristit u političke svrhe, svi se kunu u poginule branitelje, koji su dali svoje živote za da bi imali slobodnu Hrvatsku državu. A kako im to vračamo?

P.S. Sriča eto da u našemu selu postojidu osobe kojima ovakva nebriga smeta i koji če krenit sa inicijativom i prijedloziman da spomenik poginuliman braniteljiman na rivi bude obilježje kakvo poginuli Hrvatski branitelji i zaslužujedu da bude.

Ovde san mislija kad je do ove male ča sidi na spomeniku došla neznan ko,mater, teta, rodica,da če je maknit,ali ne,samo je podigla na noge,biče,jer je ledeno na kamenu sidit?