A ča je, ne pišeš ništa o predizborniman radoviman ča su počeli,pitadu me po selu,a koji to predizborni radovi?,koji si ti funcut,ajde,ajde,znaš ti o čemu se radi,a da nije oba onemu ča su počeli kopat tamo na cesti navr onega potoka ča gre kraj anbulante,ajme koji čudan svit,najpri govoridu,vidi, kako po cesti leži voda,kako kad gremo nanoge zapinjemo priko bovani i upadamo u lokve,blato i sad kad se to gre lipo napravit,onda opet nevalja,sad su to predizborni radovi,a nije to baš tako kako ko misli, nacrtat na bokun karte i ajmo ča radit,triba tote najpri sve lipo izmirit,pa onda sest za stol i vidit, da kad se več kopa, čako ne izostavi,e,nečemo sad kopat, pa onda opet za koji misec se sitit da se nije meka koji kabel ili nedajbože cijev,kad se več kopa triba pazit na svaki detalj i zato jema bit da se to ovoliko čekalo,a to ča je ispalo da se baš pri izbore počelo radit,to je, milijun posto san siguran slučajnost,a tribalo je vrimena za to sve lipo ušestit,nacrte napravit,pa natječaj za izvođača učinit…,oli niste čitali kad je lani u prvi misec Gradonačelnik Udovičić da intervju u kojemu je reka da je izrada projektne dokumentacije i rješavanje imovinsko pravni odnosi za nogostup od Sučurca do Solina bija zahtjevan i dugotrajan posal i da če se napokon ove godine krenit sa izgradnjon,eto,po tomen ispada da je sa radoviman tribalo još prošle godine počet,ali ka ča san več prije napisa,bolje je to lipo po malo,na tenane učinit,ne prišit,sve kako triba utvrdit,za da se čako nebi zaboravilo.

I evo, nakon duugiii 27-28 godin, jerbo je to sve počelo tamo nigdi 88-89 godine (onda su kupljene i cijevi za kanalizaciju koje su bile skladištene u fabrici,a kandelabri za vanjsku rasvjetu u bivšemu jugovinilu), kad su ljudi davali dijal svoje okučnice,a za uzvrat jin je rečeno da če dobit zid,kanalizaciju i da če jin struja ič ukopaniman kabeliman do kuuč (vidite na slikan i dan danas ti kabeli viridu iz zemlje) pa je malo nejasno ovo šta je Gradonačelnik reka da su se sređivali imovinsko pravni odnosi,jerbo je ota zemlja sa ove strane zida još uvik na pojediniman vlasniciman zemalj,bar na oviman sa kojiman san priča,tako da je sve to malo čudno,a i kad san ji pita jeli vas ko kontaktira,reka da če van se sad sa oviman radoviman sredit kanalizacija,podzemniman kabeliman spojit struja do kuuč, kako je prema dogovoru tribalo bit,a da koliko oni znadu odo toga nima ništa,a i u onomen ča je za ove sada radove pisalo da čedu činit,(proširenje ceste,riješit oborinske vode i napravit korniže za pješake) ne spominje se ni kanalizacija ni struja, čekaj malo,a to ča se zemlja i dalje vodi na vama,očete dobit onda koju naknadu, ništa,nimadu odgovora,samo sliježedu rameniman.

E moj čovik,ovoliko se godin čekalo da napokon krenedu sa radoviman,a da ovin potezon nečedu napravit kanalizaciju za ono par kuuč koje se nalazidu usrid sela,pedesetak metri od Gospice, mi je malo čudno,ma sigurno se u ono priopčenje ča je išlo u javnost o radoviman na ovoj dionici od Gospice do anbulante, prikrila štanparska greška,pa je oto di se spominje kanalizacija nigdi „ispalo“,jer ne mogu virovat da če se sad raskopat cesta za postavit cijevi za oborinske vode,napravit cesta sa obostraniman kornižiman,a onda če,kad bude,opet razbijat cestu za učinit kanalizaciju? Neznan,ja i dalje mislin da se to neče dogodit,a ako stvarno oče,onda,najbolje,neka stoji,kad je moglo ovoliko,more još toliko.

A dokle trajedu radovi najbolje je jemat u kajin,maštil,teču,bokal… čako spremne vode,jerbo je mala vjerojatnost,ma koliko se ko pazilo, da se neče ruvinat koja cijev,a i ko more, najbolje je izbjegavat ovde prolazit,jerbo su velike gužve,a radovi če po službenoj verziji trajat nigdi do sredine petoga miseca,a kad če stvarno bit gotovo,to če bit iznenađenje.

Ovo su se još onda počeli ukopavat kabeli i tako stoji do dana današnjega: