U nedilju je na Spliskoj rivi održano javno predstavljanje platforme Pokret otoka uz perfomans pod nazivon “Čujete li svoje otoke”.

I ka po običaju bilo ča da se događa to se oče politički infetat,pa je tako jedna grupa sa strane malo bučnije komentirala,a vidi ove ča bi sad oni tili,a govori mu ovi jedan otočanin,a ništa došli smo Vas u Split malo obač i pozvat Vas da dođete malo na otoke vidit nas,a ovi drugi se da u priču sa jednin sa Mljeta i govori da kako je lipo na Mljetu,da je on tamo bija dva dana,a nisan uspija čut ča mu je ovi sa Mljeta odgovorija,ali se sičan kad smo ja i ona moja ka momak i cura išli na Mljet koji je stvarno predivan,ali,uvečer je jedina zabava na tomen otoku bila čekat u redu isprid jedne pekare, kad čedu bit gotove krafne,a točenje benzina u auto je bija nezaboravni doživljaj,reklo nan je da benzinsku punpu jemadu u Sobri,a iako nije baš niki velegrad moran priznat kako smo se u potrazi za oton punpon bili izgubili i ka po običaju ona da san ja kriv jerbo nisan dobro gleda pa smo otu benzinsku punpu sigurno promašili,a ja da je ona krivo skrenila,a nije nan bilo druge nego u otoj pustari pronač koje čeljade i pitat ga da nan reče di je ota benzinska punpa,a ovi nas je uputija da se vratimo jednu dva tri kilometra nazad i da nikako ne moremo falit jerbo je tika uza cestu, a dobro, e sad je bilo opet karanja,da kako nisan dobro gleda,ja nisan vidija,a ušto si ti gledala pa si je promašila,ovi put smo lizli po cesti da nan ota punpa opet nebi utekla,ali punpe nima,a kad smo prolazili kraj nike kučice od bloket sa nikiman bačvan okolo nje pitali smo ovega jednoga ča smo ga tote trevili da di je benzinska punpa,a on nan govori da upravo u nju gledamo i da je benzinska,ali punpa sigurno nije,kad ča,ote bačve ča se vididu su “rezervari” za benzin i dizel iz koji se, ovisno koliko komen triba, ručnon punpon iz bačve pritakalo u bidun (bila su dva,jedan za benzin,drugi za dizel) mira, jedan bidun=deset litar,ovako ništo ne moreš nikako zaboravit,a isto tako ni facu jednoga čovika kojemu je u pasata zagrebački registracij bidunon ulivalo benzin,a koliko je čovik bija preneražen moglo se vidit kad mu je ovi ča mu je uliva benzin iša vratit ostatak pinez,a ovi nije uspija niti progovorit, samo je diga ruke,ka ono ne triba ništa i cili u čudu gingajuč glavon,ne virujuči šta vidi,je brže bolje seja u auto i iša ča.

Ok,to je bilo pri dvadeset godin i sigurno je da osin ote pekare o kojoj san gori bija pisa sad jema i drugi zanimacij,a šta se tiče ove točionice benzine,četiri pet godin nakon nego ča smo tamo bili,na televiziji smo vidili kako je Sobra napokon dobila pravu benzinsku punpu.

I sad če ispast kako san ja ovde pobiga od teme,a nisan,problemi otočani i dalje su prisutni,a sviman su puna justa otoci,ali po rješavanju infrastrukture i ostalih problema šta tištidu otočane, vidi se, da nisu baš prioritet,a otočaniman ne preostaje ništa drugo nego cilo vrime to napominjat,dok se problemi ne počmedu rješavat.