Ove dane u selo su glavna tema stupovi i prometni znakovi ča ji na nji mečedu,jema ji toliko da je jedan reka da kad bude grmilo triba bižat sa ulic ča,jerbo se po selu govori da bi tribalo meknit okolo stotinjak stupi,čak je niko turnija u opticaj i brojku od nji stoipedeset,a mene u po običaju napalo,da kako o ovemu cirkusu sa znakoviman ništa ne pišen,a ča ču napisat kad svaki dan iznikne po nikoliko novi stupi,a znakovi po ulican se minjadu ka bičve i onda san tija čekat da sve to bude gotovo,pa onda vidit di, ča, kako,koliko…,ali,danas se dogodilo ono ča su ljudi u selo cilo vrime govorili da triba učinit,a to je, da priličan broj oti stupi i znakov triba maknit ča,jer nan selo sa njiman stvarno nakaradno izgleda,a da če se ništo po tomen pitanju učinit dojavu san dobija sinoč i ča je najgore mislija san da me ovi ča mi je reka zajebaje,stvarno če počet skidat pojedine znakove ča su ji mekli,pitan ja ovoga,je,je,a čekaj malo,ako je več napravljena studija,pa kako če se sad ič mimo nje i nisu li se na račun ote študije kupili znakovi i cijevi ča nije baš tako jeftino i nije mi jasno sad ovo ča je određena firma izbužala rupe,mekli stupe,zabetonirali,zavidali znakove…,to košta,a i skidanje isti,isto tako,a ko to plača?e tija san ti sad reč,čujen sa druge bande,ali opet, nisan mu baš povirova,ma zato ujutro, kad san se čuja sa ovin drugin koji mi je reka da su danas prestali sa stavljanjen novi stupi i zavidavanjen znakov i kad mi je isto tako spomenija da bi se pojedini znakovi mogli počet skidat,zaključak je pa, da triba poč u selo vidit ča če to bit,a bilo je to da su se rastizali nacrti i odilo po selu i ništo sinjavalo,križalo,po podu pisalo,a tamo okolo ure ipo počeli su se i znakovi skidat,stupi pilat,a dijal odo ti skinuti stupi i znakov i oni ča su ostali morete vidit na slikan,a kad sve to skupa bude u funkciji,jerbo kako se govori, nakon ča sve te znakove meknedu,onda bi tribalo počet po cesti pituravat,pa bi valjda nakon toga tribali bit pametniji,jerbo se u odnosu kako je to prije bilo dosta toga ispromišalo,a kako stvari stojidu i još če.

Ovako je to bilo na mulu sa postavljeniman znakovima:

Evo npr, na ovemu prvomen stupu ča nima ništa govoridu da je triba doč znak STOP iako odotamo nima ceste,jedino ako ne postoji koji projekat sa moston od Sokolane do Mula?

I onda je na red došla brusilica:

I sad to izgleda ovako:

A sad čemo malo vidit koje prometne novitade imamo:
evo ovde je meklo znak i sad se više iz pravca istoka ne more ulazit u Varoš,ali ka ča morete vidit uredno se kršidu propisi i zanimljivo je bilo vidit ko je tote proša:

Pa onda je novitada da se sad niza Kajin brig more i uzgor i nizdol,a u ovi trideset i ništo godin koliko jeman dozvolu uvik je bilo da se more samo odozdala prema gori,a i ovi ča gre odozgara prema doli tribat če lipo zalomit za skrenit nizdol i direktno gre prema onemu ča dolazi odozdala jerbo se kad bude parkirani aut neče ima di maknit,a i bit če tisno,a i jeli koko razmišlja di če u otemu tisnomen prolazu uz Glavicu pješaci prolazit?

A oko ovega znaka ispod stopa ča na sebi jema crvenu i crnu strelicu je bila karba i ako ko od Vas zna ko ovde jema prednost neka slobodno napiše,a zanimljivo je kako na ovi gori znak sa dvi strelice u trokutu nije prikazano ko bi u prolasku triba imat prednost?

Nelogičnost mi je i ovo šta je u ulici navr starega kina meklo znak da se ne smi skrečat livo prema Gojači,dok je na početku te iste ulice meklo znak zabrane vožnje prema doli? Zar to nije bezvezno duplanje znakov? I još ništo,na ovoj doli slici u dnu ulice more se vidit kako smo na glavnomen putu,ča oče reč da imamo prednost,a kako moremo jemat prednost kad uopče u nju odozgara ne moremo uč?

Ako več to tako mora bit onda zašto taki isti znak,da se nesmi skrečat livo, nisu mekli kraj stare škole da se ne more tamo skrečat prema pošti, jerbo je i tamo meklo znak zabrane ulaska u ulicu sa istoka?

Nelogično mi je i to di su mekli ovi znak odma iza banane da se more parkirat,jerbo se vidi po tragoviman na asvaltu dokle se lomi desna okuka,a znak je za dozvoljeno parkiranje stavljen tako da se skoro pa iz punoga desnoga,volan odma mora motat na livo?

A i ovo mi je na južnomen kantunu od starega kina isto ka malo čudno:

Ovde kraj apartmani Marijeta,oliti ga bivše Flore,kako su rekli,ima bit da če se maknit ovi znak zabrane prolaza i da če oto sad bit dvosmjerna ulica? A da u tome jema istine govori i natpis na asvaltu na kojemu se vidi da če umisto B 04,meknit znak A 26, koji je ustvari znak za promet u oba smjera.

I još se puno toga danas po asvaltu pisalo,križalo i crtalo,a ka ča san več gori bija reka tek kad sve bude gotovo bičemo pametniji i vidit kako če to sve skupa izgledat.