Ne volin ja baš puno odit na utaknice,ali eto kad su vaki derbiji onda diko povirin jerbo se Torcida potrudi za napravit lipu koreografiju i navijanje tako da je baš gušt bit dijal otega anbijenta,a i moreš napunit punu karticu o aparata tako da kasnije od dvista slik jemaš problem koje češ meknit,a koje od slik maknit jerbo bi sve to bilo ipak malo previše za stavit. I seja ja tamo,a di nego na sjever,tamo je najluđe i uvik čuješ nike novitade,(i nisan ni seja ondma san dozna koja mala iz sela gre za onega,neču reč kojega igrača iz Dinama).Namistija se ja na poziciju za kad bude koreografija to mogu lipo uvatit kad dva reda isprid mene nika žena sa diteton sa karton u ruci gleda di jon je misto za sest i odma san se sitija one moje kad je jedan put maloga vodila gledat isto vako Ajduka i Dinamo pa kad je tražila i našla misto ča joj piše na karti i došla onemu ča je tot več sidija i rekla da joj sidi na misto,za da bi oti njoj reka,a vidi ove,a ča je? oli misliš da si u teatru?
I koliko ja pratin ote utaknice tek san jučera dozna da oni BBB jemadu dvi grupe navijači,onu pravu i kako su me uputili ovi sa tribini onu falšu. A ča se dogodilo? tamo nigdi usrid utaknice na tribini di su se nalazili počeli su dolazit specijalci i redari koji su okružili onu manju skupinu navijači tako da se sad između jedni i drugi učinija tanpon. A sad ja pitan ovega šta je bija do mene,a ča se ono tamo događa pa specijalci i redari čuvadu BBB od sami sebe? ma nije govori mi ovi,oni ča ji jema puno su oni pravi navijači,a oni ča ji jema manje su Mamičevci. A dobro je, nisan ni ovo još vidija da je između navijači koji navijedu za isti klub kordon policije i redari za da se između sebe ne bi potukli? Ma vidi me, ka po običaju kad gren vako na koje sporske događaje onda o svemu pišen osin o onome ča se dogodilo na terenu.Dobro je to sve krenilo i do sedandesete minute vodili smo dva nula,čujen okolo sebe nogometne znalce kako falidu Tudora da je lipo on to sve postavija i da je gušt gledat ji kako igradu,e,a sad kad su oni dali prvi gol zamuklo je sve i mudro se gingalo glavan,a kad su dali drugi gol,e sad Tudoru više nije valjala ni ona košulja ča je na sebi jema. Tamo nigdi u devedeset i četvrtoj minuti uputija se ja pomalo pri gužve,(sudac je produžija do devedeset i pete minute) nako poluzadovoljan jerbo iako smo vodili dva nula sad je rezultat dva dva,a ipak kad razmisliš bolje i jedan bod nego ništa i kako ja sad gren doli do rive vidiš svako malo koko spomene koga iz Ajduka i počasti ga kojin lipin epiteton,oli ukrasnin pridjevon i nikako govoridu isto ka da smo izgubili,ma vidi ovi ča se pravidu pametni,a biče nisu ni gledali utaknicu,a ja sad sa stadijona. I tako kako san se približava rivi tako san se pita ma ča je ovomen svitu? je da smo vodili dva nula,ma je protiv Dinama lipo i bod izvuč,a to san sve govorija dok okolo deset uri nisan seja u Fiču i u vijestiman čuja da je Ajduk izgubija sa tri dva.Ma dobro su oni po gradu govorili.