Mašokarič 2021

Datum:December 26, 2021 10:40 pm
Komentari
Komentiraj

Nakon ča se prošle godine zbog je….(bip) korone,17.mašokarič nije odvozija to se evo uspilo učinit ove godine,ka po običaju u malo vrimena skupilo se puno svita za vidit one ča če se vozikat na komadu daske-karičiman ča na sebi jemadu željezna kola-balinjere,na koje smo se kad smo bili dica,po cile dane vozikali,a oni veliki ča od buke nisu mogli živit,su trčali za nan i kendali di bi se ko pojavili…
Ka po običaju,sve se odvija okolo topa na Glavici okle utrka kreče i završaje,a na Kajinomen brigu di utrka prolazi,bude krcato svita,a naravno,komentari jema da bi moga jednu lipu knjigu od nji učinit,a jema i ginganja glavan uz onu nezaobilaznu,a vidi luđakov,ma to je sve dijal ovega folklora koji ča se utrke tiče traje okolo sedan minuti,a kako utrka krene,tako i gledaoci trčedu na drugu bandu,tamo kraj stare škole i pošte,za dočekat natjecatelje,a dio publike(ka ča čete vidit na jednu od slik)trče kaletan kroza get…

Ekipe primjenjijedu razne taktike za ča pri do cilja doč,jer je staza zahtjevna,nakon nizbrdice,moradu sač sa kariči i sa karičen ispod ruke pritrčat dijal di je bila stara crikva,tako da puno nji kalkulira je li jin bolje sve doli do kanpanela se vozit,oli koji desetak-dvadesetak metri pri sa kariča sač i uvatit se trčat,pa jin onda gre jedan dijal ravne etape od Mula do Banane,bez ikakvi preprek,a zadnja etapa jin je uzbrdica,a na vrju ote uzbrdica čeka ji zamka,rešetke priko cile širine ceste koje su žestoki neprijatelj balinjeraman,to da za ovakvu utrku triba jemat dobru kondiciju ne triba niti spominjat,posli utrke puno nji se iskrene po podu,a bude  i povračanja.
Koga zanima koje su  tri ekipe među prviman došle na cilj more vidit na ovoj ispod slici,kraj ekipe je sinjano sa rimskiman brojeviman.

IMG_3897

Inače ovu godinu je sudjelovalo devet ekip,a nagrade su več sviman odavna poznate,prvo misto je vriča pinez od sto iljad lip,drugo misto je dvadeset iljad lip,a oni na trečemu mistu dobijedu nagradu od deset iljad lip,naravno uz lipe dobijedu i medalje.

Tradicionalan,desni bakalar na badnji dan

Datum:December 25, 2021
IMG_3831

Sičate se one priče o desnomen i livomen bakalaru u našemu selu,ovi desni je oduvik bija,a oni livi kako je brzo doša,još brže je izdušija,pa kako prije tako i jučera na Badnjak Matela je doli na Rivu dilija oni desni bakalar,uz oni na brujet bija je i oni na bilo,ka i makaruni sa bakalaron,a naravno bilo je i pršurat ka i Matelinoga vina,crnega i bilega. A pošto se nikidan u…

Otvori ...

Dragan Kovač napisa je knjigu

Datum:December 24, 2021
IMG_3820 (2)

Ustvari, da se stručno izrazin,nije to knjiga,več zbirka poezije sa kojon je Dragan počeja pri jednu sedan osan godin,kako bi mu došla misal vazeja bi olovku i to meka na kartu,jer puno puti ako to ne zapišeš ode misal u nepovrat,e i sve to ča je pisa po škartociman,na komadu novine,zgužvanomen komadu karte koji bi mu se u tomen momentu naša pri ruci… sad je meka na jedno misto,odlučija je…

Otvori ...

A ča je ovo,pola sela prati šta se događa sa kanpanelon?

Datum:December 22, 2021
IMG_3807

Da od prvoga dana od kako su se jema dvi godine mekla nova svitla na stari kanpanejal jema problema to znamo,ali da se ovako prati šta se u ove zanje dane sa njin događa,me ugodno iznenadilo,pa se zna i ura kad se došlo popravljat i da če prije nego šta se uvečer užgalo,večeras sa svitliman sve bit u redu,a vidilo se pratilo se dokle se okolo kanpanela radilo,ajde dobro,za sad…

Otvori ...

Ovako je to bilo u nediju na utaknici od Ajduka kad je igra sa Osijekom

Datum:December 20, 2021
IMG_3731

Nakon šta se u redu za kupit karte čekalo po četiri,pet,pa i više uri,doša je i dan od utakmice. Od kako san pročita da je ovi jedan otkrija cijenu za kartu,na crno od sto euri,pala i meni ideja,gren ja ovima svojiman doma reč da onda i ja bidan miritan za ono ča san u filu sta, bar da mi svaki po sto kun za kartu dadu,neznan ko me je bolje…

Otvori ...

Ma ja ne razumin ovi naš svit?

Datum:December 18, 2021
IMG_3294

Najpri kad če,kad če,a sad kad je stari kanpanejal napokon prosvitlija,opet nevalja,a ča Van sad nevalja,a ti ka ne vidiš,je li,a neznan na što mislite,prosvitlite me,ako te ja prosvitlin ovi če jedan,a drugi nastavija,a ti ka ne vidiš da ne goridu sve konture od kanpanela,a,a je,eto kad si spomenija vidin ka da mi je ništo čudno,čudno je li,a je dobro si reka,uvalija se sad i treči u priču,čudne stvari se…

Otvori ...

A zašto ovi ljudi stojidu u redu? Za brašno,cukar, ulje,mliko…?

Datum:December 16, 2021
IMG_3209

Kolona svita koja strpljivo stoji u redu je slika koja cili dan krasi Mramontovu ulicu u Splitu,a znatiželjnici koji prolazidu gledadu u čudu i pitadu,a je li ča se to čeka,pa je bilo,kako dilidu bonbone,kasnije je umisto bonboni bija sladoled itd.itd.,dobro,kome bi se reka i pravi razlog,pa kad bi čuli da ovi pusti svit stoji u fili za karte od Ajduka kupit,onda bi činili ono cccc i gingali glavon,pa je…

Otvori ...

U ulici Rimski put pukla je tlačna cijev od kanalizacijskoga sustava

Datum:December 16, 2021
IMG_20211215_155143

Sriča da niko nije naletija kad se jučera zbog puknute tlačne kanalizacijske cijevi u ulici Rimski put raspukla cesta. U početku san brojija ova puknuča,ali san odavna prista,jerbo svako malo u dužini od jednu stotinjak metri cijevi od ovega kanalizacijskoga sustava znadu puknit. Je li,ka ča ljudi govoridu,niko štako krivo napravija,materijal od kojega su učinjene cijevi,nije baš kako bi triba bit,nigdi se siguro falilo,jer ovo nije normalno koliko su puti…

Otvori ...