Nedilja je i nji pet lajoni Marijeta,Domina, Filomena,Kate i Mandina su se uvatile veliki priči na svojoj popodnevnoj kafi. A ma jeste li vidili koliki su lancun učinili za napisat izborni „listič“ za ove izbore u EU parlament. A je moja Kate mislin da su mu proporcije nigdi okolo 42 X 62, Asti Filomena ako su ti točne ote mire onda če svaki od nas kad dođe na biralište dobit plakat ka izborni listič. E, a di ču ga ja onda moč rastegnit za sve vidit da nebi čako krivo mačala i da me niko ne vidi šta san zaokružila. Asti tebe Mandina,a poznavajuč te koliko bi do sad izgubila vrimena okolo ono mali lističi za da nebi falila, mogu mislit koliko če ti sad tribat na ovemu lancunu vrimena. A recite vi meni di čedu se oti lističiči uvaljivat?kolika če onda to onda kutija bit? A biče ti Marijeta ka ona kartonska škatula od televizije. Asti Domina,a neš ti onda kutije,cile su uske i kako… Ma šta kako,kako, lipo, ne ove škatule od novi đentilasti televizij,nego one škatule od dobri stari punaški televizij šta je bilo po pedeset kili u njiman. Aaaan tako.

A kako če… ajde lipo ti i kako če eno nako če ostavimo se mi izbori,jemamo mi pametnijega posla oko te Evrope eno nikidan se moglo čut kako se naši sa Slovencima natižedu okolo geografskoga podrijetla i kome če pripast ime Kranjska kobasica, pa nas Izraelci priko Eu komisije pritiščedu da pazimo ča čemo odlučit o golfu na Srđu, a sad najnovije ovi iz Eu su nan zabranili,pa sa ulaskon ovo lito u uniju ne smimo više koristit ime Prošek, jerbo da Talijanci več imadu oto ime Prosecco,a pošto su oni več u EU onda se konta oto njijovo,a mi moramo nač zamjensko ime. Eto ti na Kate tebi i otoj EU,a reci ti meni kako bi ja sad tribala zvat prošek? Šta čedu sad ovi naši ljudi ča su milijun godin činili prošek sad činit? Liti kad prolaziš našon obalon na svaki deset metri moreš vidit natpis prodaje se domači prošek. Oče li du sad ljudiman naplačivat kazne zbog taki natpisi, ajme da mi je pokonji otac živ kako bi ji lipo posla u bip matebip nji i ote njijove propise. Jemamo ime prošek koji je ka ime-brend star pet stolječi.I Petar Hektorovič je 1556 godine u oniman Ribarskiman prigovaranjiman govorija o konzumacijan prošeka. Eto van na kad nan nije valjala neovisnost.Dugo smo samostalno durali. Pobigli smo ča iz juge jerbo su nan zapovidali kako čemo i sad smo odma potrčali pod druge skute, a oče mi ko objasnit zašto? A ja ču ti objasnit moja Domina,a zato da bi opet mogli vikat kako nan drugi naređijedu ča tribamo činit jerbo smo mi stvoreni za nalazit kako nan je niko drugi kriv za ono ča nismo kako triba učinili. A jeli to Kate opet ono po jugoslavensku vanjski,a i oni unutarnji neprijatelj nikad ne spava? Je Filomena,to ti je ona da ako nimaš neprijatelja svakako ga tribaš izmislit i na račun njega sebe propagirat.

Znate ča ajte kvragu i vi i oni unutarnji i vanjski i prikooceanski i planetarni i međuplanetarni i ko je su sve i koje čedu u budučnosti nove neprijatelje pronač samo da bi se opravdali. Ljudi moji triba ovoj mladosti ča luta ulican bez posla kruva u ruke dat,a ne se sa izmišljenima neprijateljiman karat.A Filomena,kad je vako lakše. Evo ča je Kerum izjavija da ako ne bude križ do ovi sad izbori da če sebe zamisto njega na Marjan meknit,a sad vi meni recite ko to more onda zaustavit stavljanje križa ako se zna da su privatne financije osigurane,a on ka Gradonačelnik ga more progurat,ali ne,triba i ovde sad izmislit kojega neprijatelja kojega če onda prozivljat sa govornice kako je oti i oti,a slučajno če možda to bit upravo njegov protukandidat kriv za to šta mi nimamo na Marjanu križ. Dobro si ti oto Marijeta rekla,a meni nije jasno ča je do sad čeka? Jema je četiri godine vrimena za sve lipo pripremit. Ajme meni Kate,a lipo san ti sad sve objasnila. A šta bi on sad po tebi za izbore triba govorit? A bože mi prosti,kako on to misli da bi zamisto križa sebe na Marjan meka? Možda če to bit štako modernoga,jema ti u Pariz jedan restoran koji se dok u njemu jiš cilo vrime vrti,a pa možda če i on bit u kojoj staklenoj škatuli i vrtit če se okolo tako da ga cili Kaštelanski bazen zajedno sa Trogiron Bračen i Šolton more vidit? Ma bravo Mandina,a ja bi mu još mekla pirije okolo tako da ga kroz cili 24 ure u komadu kad mu padne čako napamet za da mu ne pobigne misal odma na licu mista moremo čut šta jema pametnoga za reč.

Eto nji u Split tamo,a mi jemamo svoji problemi,oni svit ča stoji priko Magistrale i dalje ne more prolazit onin podhodnikon ča su rekli da su ga učinili za pješake, jerbo Rišič i dalje prolazi tamo di je i oduvik prolazija kad bi provrija. Vidiš ti moja Mandina,a znaš li ti da če se tamo kad se bude činit ona HE Ombla usput potopit jednu petnajstak metri nike špilje koja je trenutno stanište od šišmiši,a umisto nje če se napravit nova „galerija“ koja če imat iste klimatološke uvjete ka i ova originalna špilja sada,a tokon gradnje če se kontrolirat ulazak ljudi i strojev
da beštije ne bi dobile stres.. E i ča mi ti sad Domina s otin očeš reč? A oču ti reč oto da su ovde u naše selo vodili računa o tomen di če voda proč, tamo vodidu računa o tomen di če beštije stat,a ko vodi računa o ljudima? Ajme Domina koja teška pitanja u ovo lipo nediljno popodne radije se pribacimo na koju drugu temu.

Eno smo sve jučera bile na križnome putu.
Je Kate bile smo,koko duhom,a koko samo tilon.A šta je reč Mandina? A ništa Kate cilo vrime si čakulala,a ako nisi znala tribalo je molit, je Mandina,a reci ti meni jeli ti bija red zapalit duvan? Nisi mogla izdurat bila bi pukla da ga nisi zapalila. Ajme evo ji opet,a ča se ti Marijeta javljaš, izgori češ ka Černobil koliko si mobitelon govorila, dvi ure u komadu ga nisi sa uva skidala. A šta ču kad me zva oni moj sa broda morala san s njin pročakulat,a vidin Domina kako si ti bila skoncetrirana,cilo vrime si okolo zvirkala ko ča radi a par puti je i meni bilo neugodno kako si se smijala. Jeli Filomena,a nije ti bilo neugodno slikavat,a šta ti sad smeta šta san ja slikavala,a ne smeta ti šta je oni tvoj pi… ajme meni evo jina opet ajde više prikinite sa karanjen. Evo je danas cvitnica jeste li se umile u vodi sa laticaman o cviča? E to če ti Kate pomoč,ma vidi prava mi se javila, da je Marijeta ostrugat to patine ti sa lica moga bi.. ajde stvarno se više fermajte gadit.Dobro je ajde onda čemo o lipin stvariman, eto o slikarstvu, a šta to ti Kate znaš o slikarstvu,ti si ka i one pokondirene tikve koje bi da jin je na platno meknit maču u toču jemale pet dan o tomen šta govorit i divit se,je li Filomena,a kad nisu svi plave krvi ka ti pa su se rodili sa pedigrejon da se u sve razumidu

Ajmeeeee. Dostaaaaaaa. Ma šta je dosta nisan ja još rekla šta iman za reč. A šta to ti Filomena jemaš za reč,a eno Kate u Zagreb ti je došla izložba o Pikasovi djel i odma na samome otvorenju se skupilo okolo sedan iljad svita,a ti si ovod? A di bi to tribala bit? A gori na izložbi.Je to izložba koja piza 670 miljuni euri, ma jon fali ono ništo da bude potpuna,ono ča se reče šlag na tortu, zaludu jin je šta su otu izložbu dovukli u Zagreb ako je Kate ne obađe i reče onu svoju završnu misal koju čedu svi važniji svjeski mediji prinit.
Znaš ča Filomena kvragu ti i po kolina ti od one druge bande, odnija ti vrag otu lud…
Aj adijo triba ča pri odavde pobignit jerbo kako su počele biče svega, pa da ja do kraja nebi pisa samo bi, bipove najbolje odma prikinit.