U posjet nan je doša največi ratni brod na svitu,a nas od svega zanima kako uspijedu nahranit otu pustu posadu?
Prošlo je evo desetak daan kako je ono „malešne šešulice“ od Američkoga nosača avijona išlo ča,a još se o njemu raspravlja,nečemo oba tome kako je jednima drago šta su došli,a drugima šta su išli ča,nečemo ni o naoružanju i opremi ča jemadu na otemu brodu,da nan je deseti dijal od toga auuu,di bi nan bija kraj,a možda je i bolje da nimamo…
Malo čemo oba tome koliko ji na tomen brodu ima,a ima ji umalo ka i nas u selu,samo okolo koju iljadu ipo manje,e i sad,svi se oni nalazidu na otomen brodu,a ka ča je to u našemu selu i drugiman mistiman,tako je to i na otemu brodu,jema oni ča se volidu,a jema i oni ča se mrzidu,a jema i čimavic pa jedva čekaš kad češ ga se otarasit…, lako je u selu,nemoraš onega ča ga ne voliš nikako ni vidit,ali ajde ti pa se sakrij na brodu od jednu 333 metri,to bi bila dužina nigdi možda od anbulante do škole,plus minus-vamo tamo,a pa ti sad izbjegni onega koji ti ne šmeka,jer je mala vjerojatnost da ga u to trista i ništo metri nečeš vidit ili u šetnji ili u teretani ili u kojemu dučanu ili u kino dvorani ili u čitaonici ili …
Jer sve ono šta ima jedno,ne selo ka mi,več grad,to isto se nalazi i na tomen nosaču.
Ali dobro,o tomen nije bilo govora.
Šta je bila ka glavna tema ovi ča san ji sluša dokle su oba tomen brodu govorili,recimo sad da po onemu ča se govori i računano u grubo na tomen nosaču koji je največi na svitu jema nigdi okolo pet iljad i četiristo,pesto, šesto svita i sad je priča bila okolo toga,a ča oni jidu na tomen brodu,okle jin ota pusta spiza,pogotovo kad su po nikoliko miseci nasrid kojega od oceani,a dnevno činidu okolo osamnajst iljad obrokov,nečemo govorit o drugoj spizi,eto dosta samo da svaki od nji izi po jedno jaje dnevno,pa sad ti računaj koliko je to samo jaj,a i okle jin jaja ako moredu izdržat samo okolo niki misec daan,pa i manje, od kako ga kokoš snese,a oni su po nikoliko miseci na brodu,a jedino „kopno“ ča ga u to vrime vididu su ustvari leđa od kojega velikoga kita,pa je priča išla dalje i ovi drugi govori,ja mislin da na tomen brodu jemadu i kokošinjac,ali zato je bila najjača od ovega trečega,kad jin je reka,a jeste nepametni,kad jin pofali spize onda pošaljedu pilota sa spiskon pa on sede u (fantoma-avijon) F-16 oli u F-18,ovisi kolika je priša i trkne do najbliže samoposluge kupit ono ča jin triba.
A ča ti misliš,doša nan je u posjetu jedan od največi nosači avijoni na svitu i ne govori se ni o brodu ni o onomen ča sve na njemu od opreme, naoružanja,avijoni,helikopteri…jema,nego su se oni uvatili priče koliko tamo spize izidu,okle jin ta spiza,a naročito jaja,jaja su ispala največa enigma? 😀
Prosvjed u Dugome Ratu
Danas je u podne u Dugomen Ratu počeja prosvjed kojega je organizira opčinski načelnik di su stanovnici blokiranjen prometa na Magistrali još jednom ukazali na problem šljake s kojon imadu suživot več dugi niz godin,a kako govoridu,nadležni su spori u rješavanju ovoga problema,a ako se ovako dalje nastavi govoridu da bi se sljedeči prosvjed moga održat na Markovomen trgu,a u posjete čedu doč sa kamijoniman puniman šljake… E sad,nakon ovega…
Otvori ...Tribadu li nama ovde zimske gume?
Ova desna guma je zimska,more se pripoznat po sitniman reckicama koje su ključne za snig i led… Svima onima koji imadu aute dogodilo se da se u zimsko vrime kad padne kiša pri kretanju trza,pogotovo na nekoj uzbrdici ,proklizaje pri okričanju “punin” livo ili desno,pri kočenju mu triba puno za zaustavit se… E upravo se to i meni događalo i niko mi je pri desetak godin reka da neka meknen…
Otvori ...Da ča je ono na Gojaču betoniralo
I jema več više od petnajst daan da stoji tako? A to je betoniralo za meknit sprave za vježbanje,a to ča je betoniralo tamo di ljudi liti u ladu ležidu,je naišlo na osudu puno nji. Nise jemalo di,nego je baš onde tribalo betonirat? A jeli to odluka novoga mjesnogaodbora? Lipo ste počeli sa radon… Asti,a ni krivi ni dužni udri po nan,a za oto misto je donila odluku jedna rukovodeča…
Otvori ...Pampas iliti ga po našu,perušina
Ova biljka procvita taman onda kad se masline beredu,a ljudi su u stara vrimena otu perušinu brali i ranili jerbo bi jin kasnije tribala kad bi ulje u kamenici bilo pri kraju i kad se više nije moglo sa ničin grabit za izvadit ote “zlatne”kapi,onda bi ljudi po dnu kamenice prolazili oton perušinon koja bi “pospugala”ulje,pa bi onda pažljivo to rukon cidili u teču itd…
Otvori ...Rasvjeta u podhodniku kraj Jadranova igrališta
Reklo mi je da gren vidit kako se u podhodniku kraj Jadranovoga ništa ne vidi jerbo je niko izgulija rasvjetu i visidu kabeli i ka šta vidite na slici to je popravljeno. Inače ovo je po ko zna koji put da se niko iživljaje nad oton rasvjeton,a odgovor iz opčine bude kako oni napravidu,a ovi nakon nikoga vrimena razbijedu,pa onda triba čekat da se to opet napravi i tako sve…
Otvori ...Kako sad izgleda ona instalacija šta je meklo na šetnicu šta ide prema Sokolani?
Najpri je to bilo ovako: Pa je onda niko učinija preinake na sloviman i onda je to izgledalo evo ovako: A sad je to ovako:
Otvori ...Na današnji dan pri sedandeset i osan godin oslobođena su Kaštila
Danas je u Sučurcu povodon 78. godišnjice oslobođenja Kaštili u Drugomen Svjeskomen ratu položeno cviče i upaljene šterike na spomen kosturnicu palih boraca. Inače, Kaštila su bila okupirana 1273 dana,a od ondašnji šest iljad stanovnikov u borbi je bilo 1631 Kaštelanin,dok je poginilo nji 421,a od toga je bilo osandeset Sučurani.
Otvori ...Dite od dvi ipo godine u Gospojskoj štradi je našlo otrovne mamce za pantagane
Uzelo u ruku i nosilo materi i pitalo šta je ovo? Ne mogu uopče zamislit roditelja kojemu dite u ruci drži kocku za miše trovat,šta mu je sve u sekund kroz glavu prošlo,ne znajuči je li dite možda otu kocku zagrizlo ili liznilo,a i sami pogled na dite koje drži otu otrovnu kocku u ruci,roditelja obuzima panika i nezna kako bi u tomen momentu razmišlja,a reagirat triba na brzinu,jerbo pojedini…
Otvori ...
Komentiraj