Naravno,posli svakoga događaja počne se sa raspravon, jeli to moglo ispast drugačije nego ča je ispalo, bilo to da se radi o balunu, ka i nikidan o ovomen požaru ili …, pa bi oni bija učinija vako, oni onako, odluke na bilo kojem terenu, donosidu se trenutno, onako kako trenutna situacija nalaže, ovi požar nikidan bija je sve, samo ne obični, jerbo je deralo jako Jugo, a ka ča san več pisa, ono što se događalo okolo Jurijeva je upravo ono ča se po svim parametrima nije tribalo dogoditi, a zašto je vatra onako naglo krenila prema Juri, a ko to zna, uglavnon, sve ono ča se je tribalo obranit, se obranilo, kuče su spašene, ovi jedan vinograd ča če te ga vidit na slici da ga je načelo, vatrogasci su u zanji momenat uspili spasit, a bilo je još i maslin isto tako, Sveti Jure je obranjen, Planinarski dom-obranjen,najgore od svega ča je jedan vatrogasac završija na hitnu radi oka, ali ima bit da če sve bit u redu, a to jeli moglo ispast drugačije,je vječito pitanje, koje nakon svakog događaja visi u zraku, jedini odgovor na to je da nije moglo ispast drugačije,jer da si moga učinit drugačije, onda bi bija tako i napravija,ovo nisan ja izmislija, to san pri par godin slučajno naša da je niki mudrac puno odavna reka.

Ali zato moremo utjecat na ništo drugo,opet se po ko zna koji put pokazalo da je kod ovakvi slučajev nedostatak vatrogasni putev presudan za krajnji ishod. Neču puno mudrijat,ali npr,ovo ča san ja ka lajk u ovemu požaru vidija,jedan put koji bi iša u podnožju Jurijeva prema zapadu, je neophodan,stari put kojin se moglo ič prema Veloj stini je razrovan,a upravo tote je iša proč vatrogasni konbi sa ljudiman,pa se vratija nazad jer nije moga proč-kako znan,a vidija san,prošli su kraj mene,moga bi još o putiman,ali ka ča san napisa,neču,jer če bit vidi pametnjakoviča,ali neznan ko če se uvatit okolo toga posla za ote pute vodit,svima je sve teško,ima je jedan čovik ča je puno oti puti vodija,i oni od Malačke do Sučurca,a zanji mu je bija pri niki petnajestak godin ovi prema planinarskomen domu,ali od pri nikoliko godin više nije među nan,a valjda če se nač koko drugi ka zamjena, iako sumljan,posal je veliki,a ništa se ne plača.

E i ča sad napravit?A da je bilo učinit jedal lipi Zbor građani,a? Puno nji se siča da bi se ovako posli velikoga požara sazva Zbor građani za vidit ča učinit pa da sljedeči put ne izgori ka i ovi put,a bilo bi tote razni idej,oni pametni,ka i oni malo manje pametni,a na jednomen od oti zborov kako za u buduče spasit Gaj ovi se jedan diga,da jema on ništo za reč,ajde reci,a onda je on počeja,ja bi to sve zapalija,pa bi raskrčija, posadija kunpire…nastavija on na dugo i široko objašnjavat,a dokle je to govorija slavalo ga je kvragu,a sa pozornice se čulo ajde sedi doli,e,a isto tako na jednomen od oti zborov građani našega sela su donili odluku da čedu sič Gaj i prokčit put od Vele stine pa tamo prema Kavi i nakon toga svake subote i nedilje Sučurani su se kosiriman i sikirican i možda sa jednon ili dvi motorne pile uvatili posla,kidali sve ča jin se na putu nalazilo i nakon nikoliko miseci uspili su probit zacrtani put,a u svakoj toj akciji oni iz tadašnje Mjesne zajednice bili su na čelu nepregledne kolone građana našega sela koji su oti posal napravili u rekordnomen roku.

Pitadu me po selu da kako nisan ništa o požaru meka, kako nisan, a ono kako Kanaderi gasidu Jurijevo, ajde pusti to, di je ostatak, a to če pričekat, objasnija san jin, da je zato kriv oni ča čete ga na slikan vidit u narančastu majicu sa maskon na licu, uvik me napada da san spor sa objavom i usput doda, kako ovu stranicu samo tri čovika iz sela čitadu, a ča ču onda i mečat, eto ti znaš, ja znan, ali eto, nezna oni treči, pa ču meknit radi njega.