Ovi naš Sučuraški Adventski vijenac pročuja se na daleko,a razlog tomen je šta su ovi vikend zamisto šteriku nade,užgali onu na kojoj piše mir,e pa ka prvi put je da se ovde u nas falilo, lani je na ovi isti vijenac prvu šteriku upalilo sa natpison nada,ka šta to i ide,ali je posli nje užgalo onu ča na njoj piše ljubav,pa je onda zanju užgalo par dan ranije,s tin da je treču nikoliko dan kasnije…znači,ovde kod nas ona,čovik se uči na greškan,ne znači ništa,pa moglo se bar oniman ča ote šterike užižedu,nakon onoga lani,dat bokun karte sa rednin brojeviman,kako koju od šterik triba užižat,ili iman još jednostavnije rješenje,meknite lipo drugu godinu šterike bez natpisi i ne morete nikako falit.

Evo vako je bilo do sinoč:

Nakon jučerašnje ispravke,od sinoč je vako:

A ovde doli morete pročitat dva texta od lani ča se sve okolo Advenskoga vijenca događalo:

naslov

A šta se dogodilo sa trečon šterikon

Od ove sedmice na advenskomen vijencu je tribala gorit i treča šterika,ali na onemu vijencu ča ga je meklo doli na Rivu još uvik goridu samo dvi,pa je počelo,a ča je ovo nan meklo pokvareni vijenac,na nas su ka po običaju zaboravili,kako smo zanja rupa na sviralu,tako je i u ovomen u nas čedu užgat kad uvatidu vrimena,bitno je da se doli u Kaštila svita skupi kad se palidu šterike,ma ča nan ga je uopče i meklo,kad smo mogli dosad bez njega,moremo i dalje…,puno toga je izrečeno u ovo dva-tri dana,a ovo ča san napisa je ka i malo ublaženo u odnosu na oriđinale,a ka po običaju,jema i onoga ča bi,kad bi oba tome pisa,triba ono,bi-biip koristit.

A priča o vijencu se i prije zakolutala,pogotovo posli druge upaljene šterike kad je zasvitlila ona ča na njoj piše ljubav,jerbo nakon nade tj.prve šterike,tribalo bi upalit onu šta na njoj piše mir,pa onda ide radost koju nan još nisu upalili i zanja bi tribala bit ljubav,a pa je bilo,evo u nas je to ka i sve ča nan je,ma ča su uopče mečali imena na šterike,ajde lipo,da neka napišen neka nama u buduče,ako mislidu vijenac mečat,budedu šterike bez imen,pa se bar nečemo i okolo vijenca karat,a ima i oni ča jin je sve jedno koja če se šterika po redu užgat,ka i oni ča jin je sve jedno ča još nisu i otu treču užgali…

naslov:
Evo nama u selo več gori i četvrta adventska šterika

Written by:admin
Written on:December 23, 2023

Nakon šta nan je treču advensku sviču na onemu vijencu doli na Rivu,zapalilo četiri dana kasnije u četvrtak,evo nan četvrta šterika gori od sinoč,tri dana pri?
Zove mene ovi jedan sinoč okolo sedan uri na mobitel i govori,a ča ste ono več upalili četvrtu šteriku,mi,e vi iz mjesnoga odbora,vidi se kako nan sve cvita od kako ste došli i šteriku nan tri dana pri palite,ajde pak,a biče si ti to falija,pitan ja njega,a ma koja četvrta,sinoč je tek upalilo onu treču,je,ma evo večeras gori i četvrta,ma je,a onda je niki ča je bija s njin isto potvrdija,a naravno,ka virova san i jednomen i drugomen,pa san iša u selo učinit čir,a za svaki slučaj san vazeja i fotoaparata i eto mene na Rivu i nji par je bilo okolo tega vijenca,ali uopče neču sad oba tomen pisat ča je ko od nji reka,niti oba tomen ča su opet po ko zna koji put i ovi sad prisutni šta san ji tote naša govorili, kojin se redosljedon šterike palidu,bilo bi dugo,a ko če sad nabubat toliko slovi.

Uglavnon je ovde u nas prva šterika bila nada ka ča i triba bit,a kad se upalila druga na kojoj piše ljubav,e onda je sve počelo,e nije vako nego nako,tribalo je od prve šterike nastavit palit prema desno,a oni su palili put livo,a kako triba bit,e to se Vi karajte između sebe.

Evo ova treča šterika gori od četvrtka:

A sve četiri od sinoč: