A šta je ono u Splitu u utorak bilo? Armagedon?
One ča govoridu da se ovako ništo slično ovde na ovomen području nije nikad dogodilo,odma bi ispravija,a bilo je to tamo nigdi kraj jugovinila,ali se dogodilo onda dokle ga još nije bilo,e baš nigdi tamo u jednoj baraki sta je čovik ča su ga zvali Tiro,zajedno sa svojin pason,e i okrenilo je u selo veliko nevrime koje je lipo potaracalo,a ča se tiče Tire i barake i pasa,više ji niko nakon toga vitra-nevrimena,nije vidija,tražili su Sučurani danima i danima,ali Tiru,pasa i baraku nikad nisu našli…
Ovo ča je strefilo Split je bila vrlo čudna pojava,a ja bi ga nazva nikon vrston Tornada,znan,sad če bit oni ča če reč,a ma vidi pametnjakoviča,jači je od oni ča jin je oto posal da tako ništo rečedu,a nebi ja odo timan,oni se još dodajedu ko je triba,kad je triba,je li triba…uzbunit ljude,jerbo za oto sustava uzbunjivanja usulo se puste milijune euri,a on je zamisto da se oglasi o opasnosti,muča…,ali evo,za smirit ove ča me bidnega odma napadadu,reču kako se to po stručnjaciman u utorak dogodija Dovnburst-pojava kad se ladan zrak u olujnomen oblaku naglo,pravocrtno spušta put zemlje i tamo di prođe,štetu čini put vanka,dokle Tornado usisava i zanimljivo je to da jedno i drugo znadu učinit sličnu štetu,a kolika je sila otega čuda bila da je otu pustu štetu napravilo,a največi udar vitra u timan momentiman bija je okolo sto i trideset kilometri ?
Znači ono ča san ja vidija oti dan,doša san do laičkoga zaključka kako je oto nevrimena u Splitu odilo po određenoj putanji koja,kad bi potega rigu,e onda bi to bilo od Brdi put Marjana,neču sad o širini koju je na putanji obuhvatilo,jer očito je, kako su,ča se širine tiče,na otoj “mojoj crti” ča bi je povuka,niki drugi parametri bili u igri,a to nek struka čini račune,reče koko kako mi računica nevalja,jerbo su platila i nika stabla i u užemu dilu grada,ka i na druga mista,je,upravu ste,ali to je sve bilo sporadično u odnosu na ovu moju rigu,oliti ga crtu koju san obaša od vrja do podanka i na otoj putanji vidija največu lomljavu,ča krovov, lamarini,stabal…
A to sad ča nas strašidu kako se zbog globalnoga zatopljenja moramo pripremit za ovakva nevrimena bi vratija na sam početak ovega texta i događaju iz prošlosti našega sela kad oto globalno zatopljenje nije bilo niti u povojiman…
Dobro,ovde ču se zaustavit,neču o Harp antenan o kojiman se sad opet nakon ovega događaja u Splitu na veliko po ulicaman,a i u razniman komentariman po društvenin mrižan govori,jer bi me daleko odvelo,a i uvik mi govoridu da je li mogu ne pisat kilometarske textove,a pa evo.
U ovomen nevrimenu ča je pri dva dana poharalo Split dvadeset i šest ljudi je potražilo pomoč likara, stradalo je okolo 330 aut po kojiman su padale grane,ka i cila stabla,tako da su bolje prošli oni ča jin je auto na ovu vručinu ostalo na zvizdanu,nego oni ča su malo ranije ujutro došli na posal ili na niku drugu destinaciju,za da bi auto mekli u lad,ispod kojega stabla.
Sučuračka Hajdučka noč na Gojači
U organizaciji Sučuračke Udruge navijači Hajduka ovu subotu je na Gojaču održana Hajdučka noč,za zabavu se pobrinila grupa Viva,a za one najmlađe doša je i Rico,a ča se tiče spize,e tote nisi moga reč,da nisi ništa izija,jerbo ti nije bilo po guštu,jer pored pizdic na buzaru,junetine sa bižiman,čovapčiči,hobotnice sa bobon,tunja sa gradel,crnega rižota…nikako nisi moga ostat gladan,a pa je onda bila i lutrija di se mogla dobit stolitarska bačva od…
Otvori ...Evo su sredili
Zove mene jedan jutros u deset ipo uri na mobitel i pita di si,a evo me u Gradu,pa mi govori da su sredili ono dijal plaže na Sokolani, ča san pri koji dan pisa,ajde baš lipo,govorin ja,e ali,a ča sad ali,a nisu digli oni materijal ča je bija,več su na oto nabacali novo žalo i bageron izravnali,ama čekaj malo,bija je bager i nije diga oni materijal i maka one žile,več…
Otvori ...Čiboni na staremu Placu
E nisan se privarija kad san napisa Čiboni,a ko je zaboravija,oba tomen san,ima odavna pisa,pa koga interesira,pronađite,pa pročitajte oto texta. Evo če sutra sedan daan da je (Čiboni) Điboni na staremu Placu održa veličanstveni koncerat, skupija je ekipu muzičari-pivači koji da da su samostalno svaki od nji odsvirali svoju dionicu od po ure vrimena,koncert bi bija,uvaau- mrak,a još kad uz nji Điboni krene sa pismon,a to je onda likarija za…
Otvori ...Da ča je doli na Gojaču meklo one puste Ajdukove zastavice
Da ča,a jema več misec daan da se po selu govori kako se četvrti sedmoga,ča oče reč sutra-petak na Gojaču u organizaciji Sučuračke Udruge navijači Hajduka,održaje tradicionalna Hajdučka noč,a kako če na njoj bit,ne triba puno govorit,dovoljno je samo reč da je po ocjeni građan iz našega sela to lani bila najbolja fešta,a uz dobru spizu,muzika je jedan od važniji segmenat za dobro se zabavit,a ka ča su to odlično…
Otvori ...Tags:fešta na gojači , hajdučka noć u sućurcu , sučuračka udruga navijača hajduka
A taman nan je u selo lipo sa turistiman krenilo,a mi…
Ustvari,ama briga me za turiste,nego se naš svit ne more na Sokolanu kupat,evo govoridu,jema nikoliko daan da more zna bit kafeno da ga od gada ne moš gledat,a kamoli u njega uč,a sve zbog materijala koji je daniman na plaži i to,mireči nako na korake,došli smo do desetak metri dužni neiskoristive plaže na kojoj osin materijala viridu i nike žile,kako žile,a neznan,mislili smo da je to od nikud more donilo,ali…
Otvori ...Pa,pa semafori
Evo su radovi sa uređenjen ceste na Krknjaču napokon gotovi i maklo je ona dva semafora,tako da više nima koloni od aut koje su se znale sve do Gospice protizat,nego se sad lipo more slobodno prolazit.E. O tomen ča se sad po selu priča,da zašto se nije ovo vako oli nako,ka ča se govorilo učinilo,ču do koji dan napisat.
Otvori ...O jučerašnjemu požaru (ima i kratki videjo o spašavanju Jurijeva)-dodane slike
I dok puno nji na društveniman mrižan osuđuje vatrogasce kod pojedini požari,e zašto nisu ovo učinili vako,oli nako,da san ja gori,ja bi to več bija udunija,ne bi se meni vako proširilo,napravili su veliki propust,organizacija jin je nikakva,vidi kako jin se tamo proširilo,tribali su…,ali naravno,oto sve činidu iz klimatizirani prostorij,oli u debelomen ladu sa razlađenin pičencen u ruci,ležeči na plažaman,bome,koji junaci… A pogledajmo sad jučerašnju situaciju u našemu selu di si…
Otvori ...Gori Gaj
Počelo je gorit tamo di, koliko ja znan u ovo godin ča jeman, nikad nije požar počeja,između Jure i Planinarskoga doma?? Pitanje je oče li zbog ove divlje bure Kanader moč gasit,a bez njega če bit prilično zeznuto.
Otvori ...
Komentiraj