Asti ča je lipo bit nezavisan,moreš poč di očeš i ne tribaš se mislit smiš li
Pa san tako u subotu moga slobodno poč do Poljuda vidit kako če to bit na Škorinomen predizbornomen skupu,nisan ka ovi jedan ča san ga sinja,slučajno tote,kako mi je reka, prolazija,več san tote namjerno doša,ka jema san i ja izliku da san malomen doša sa preplaton od Sjevera da mi dadu kartu za Istok,ma mi to ne triba,ka ovemu ča mi je reka da je on slučajno tote prolazija,pa ka ono iša vidit ko to tamo govori,ali isto da neka ga ne spominjen,a znaš da neču,e.
Iznenadilo me je dokle san dolazija gužva od aut i to Imoski i registracij iz Bosne tj.Hercegovine,a kad san doša tamo,nije to bija samo stariji svit,ka ča znadu govorit,bilo je tote i mladoga svita i sridnjega,koji su s oduševljenjen pratili ča Škoro jema za reč,a dosjetki mu ka po običaju, nije falilo i bilo je ovacij,pljeskanja,skandiranja,a na kraju svega je vidno zadovoljan sa skupom, Škoro zajedno sa grupon,Žakom i ostalima lipo zapiva.
An pače,da ne zaboravin,jema i ovi jedan ča se je,kad me je vidija,sakriva iza bandire,a ja san se pravija da ga ne vidin,da mu ne bude neugodno,ma me isto iznenadilo kad san ga tote vidija,a moraču sa njin pričat,ča se najedanput dogodilo pa je sad ovamo,a ne više onamo.
Nezaposleni i penzioneri ova tri dana moredu dignit bonove
U zgradu stare anbulante-sada Mjesnoga odbora, ponediljak,utorak i sridu Grad če penzioneriman iz Sučurca i Gomilice dilit Božičnice u vidu poklon bonov,dok če nezaposleni ove iste dane božičnicu moč dignit na ulazu sporske dvorane na Sokolani.Vrime podjele je od osan uri ujutro,do dvi ure popodne.
Otvori ...Na stari kanpanel je napokon meklo mriže
Jučera su na staromen kanpanelu na dva otvora prominili razbivenu mrižu, pa tako golubi unutra više ne moredu ulazit. Radila je ista ekipa koja je postavljala i rasvjetu,a pošto kanpanejal zanji dva tri dana nije svitlija onda su jin doli na Rivu rekli,da je li znadu,a da jin nije niko reka,a eto sad znate i kanpanel je sinoč opet prosvitlija.
Otvori ...Sveta Lucija
Puno nji i nezna za ovu malu crkvicu o Svete Lucije,ali ti ne dadu gušta pa onda kroz razgovor očedu ispipat za doznat. A ka da je teško lipo reč neznan i gotovo. Crkvica je to,ustvari kripta, šta se nalazi točno ispod katedrale o Svetoga Duje,a do nje se dolazi sa južne bande katedrale pa se sađe niza skale i sa jednin uskin hodnikon dođe do crkvice u kojoj se…
Otvori ...Triba ovo sredit da koga ne plesne struja
Opet je u Vriliman na razvodnoj kutiji od struje za rasvjetu ča se nalazi na zidu od podvožnjaka niko razvrnija prednji dijal, pa postoji mogučnost da koje radoznalo dite badne rukon.Zanimljivo je kako je ovo ko zna koji put do sad da su odvrnili ovi prednji dijal koji se u nedostatku originalnoga poklopca mekne od late,a bilo je govora da če se prominit cila ota nova kutija, tako da bi…
Otvori ...Bome se lipo vidi
Dokle se lani tribalo dobro zagledat di je,ove godine se puno lipo iz daljine vidi. Božično selo u Docu Gornjemu jema skoro pa duplo više lanpic nego lani. A ovako to izgleda snimljeno sa par kilometri udaljenosti: A tribat če poč vidit i kako to iz bliza izgleda.
Otvori ...Vinske ceste-Pelješac 2019
Evoga na,a ka da je nikidan oto bilo,a prošlo je več godina daan i evo,opet prva subota u dvanajestomen misecu koja je rezervirana za Dane otvoreni vraat od Pelješki podrumi, pa je bilo red poč malo obač ča se to nudi novoga o vinski proizvodi,a i pogledat koji novonapravljeni podrum u koje se ulaže puno vrimena,ljubavi i truda jerbo ji jema kad u nji uđeš da ti je toliko lipo…
Otvori ...Okrugli stol o bonbardiranju našega sela je iša u nikomen drugomen smjeru
U ovi utorak je u Biskupovoj palači u organizaciji Dragovoljačke braniteljske udruge Stina pradidova i Grada Kaštili održana Spomen večer i Okrugli stol/tribina o savezničkomen bonbardiranju Kaštel Sučurca koja je krenila unikomen čudnomen smjeru,jer su se predavači otu večer prilično udaljili od Sučurca i naše tragedije od pri 76.godin kad je u bonbardiranju našega sela stradalo 97 nevini žrtav,puna mi je kapa više otega politiziranja,di se ko koja tragedija dogodila…
Otvori ...Vlak izletija sa štrike
Jutros je u Sučurcu isprid željezničke stanice vlak ča je vozija iz Staroga do Splita sa prednjin krajen izletija sa šini,sriča da je bila mala brzina i nikomen od putnika nije ništa bilo.
Otvori ...
Komentiraj