jesi napisa?jesan.aj pošalji.evo na:

Evo ji opet,Marijeta,Kate,Filomena,Mandina i Domina koje na kafi privižitadu novitade ča su se dogodile,a znadu oni još puno toga i ča se još nije dogodilo,a tote su u raspravi glavne Kate koja naginje prema HDZ-u i Filomene koja je za SDP,a Mandina i Domina se okričedu malo vako,malo nako,dok Marijeta cilo vrime govori da nju politika ne interesira,a trenutno jin je glavna tema politička situacija u našoj zemlji koja je svakin danon sve zanimljivija,e Most traži o Karamarka da gre ča,pa onda Premijer traži da i Petrov i Karamarko gredu ča,pa je onda HDZ tražija opoziv premijera i prista  na to da Karamarko napusti vladu uz uvjet da je napustidu  i Orešković i Petrov,a hdz če dat novoga mandatara,itd.itd.,a ča se sve okolo toga događa najbolje je da poslušamo ča nji pet jema za reč,možda čujemo i rješenje ovega svega.

A ča je Kate- govori Filomena,a rugala si se meni nikidan,a vidi oni tvoji u SDP-u kako se koljedu,je jin draga stolica,pa bi Milanovič istresa kamijon drv na Komadinu,a onda bi Komadina uzvratija sa šleperon stinj na Milanoviča,pa kako bi se koji od nji oporavija, krenija bi opet ispočetka. A ja san ti lipo govorila to je demokraska stranka i kad jemaš dva kandidata na samo jedno misto,ono presjedničko,onda je normalno da dođe do trzavic,a vidi sad u Vas demokracije,najpri je devedeset i nikoliko posto na stranačkiman izboriman dalo glas Karamarku koji je za oto misto bija jedini kandidat, za da bi ga ti isti sad samo petnajestak dan kasnije počeli pljucat.

Je Filomena moja pljucadu ga bidnega sa svi stran kako ko ča u justa skupi tako se na njega istrese,a ja neznan ča su se njega uvatili,ka da je on za sve kriv?
A nije on Kate za ništa kriv, ispast ču ja kriva ča ovo govorin,ali, ako je i dijal onega ča su u novine napisali,na radijo rekli i na televiziji prikazali točno i ako čemo se igrat one zapadnjačke demokracije,onda bi oti tvoj presjednik triba dat odma ostavku,jerbo je puno političari sa zapada i za manje pizdarije išlo ča.

Je li Filomena,ti bi ka i Staljin to po kratkomen postupku,a kad več spominješ demokraciju onda pusti da institucije odradidu svoj posal,pa čemo onda bit pametniji.

A je Kate moja,čekat čemo mi čekat,a koliko misliš da jemamo vrimena za još čekat,vidiš ča vanka o nan mislidu,zbog političke nestabilnosti nan je diglo kamate na obveznice da ji ni oni sa Bruneji nebi mogli izdržat,a krediti nan dolazidu na naplatu pa se mi sad frigajmo kako čemo ji platit,a o stranin investicijan neču niti govorit,čekadu u kilometarskiman kolonan za kapital u neizvjesnost uložit.

Uplela se i Mandina- a zaboravila si reč ča nan ne samo u državi,nego i vanka nje govoridu i potpisi se protiv ministri skupljadu,a za onega iz kulture su i pojedini nobelovci svoj potpis za to na kartu stavili.
A je,je lipo je ova vlada krenila sa radon,a ča bi bilo da se nisu ovoliko tražili? Još se sičan oni iscrpljujuči dogovori pa če Most sa ovin,pa če Most sa onin,pa če Most sa ovin i onin,pa onda Most neče sa nikin,pa je onda počeja prigovarat sa SDP-on,za da bi s otin naprasito prikinija i počeja pregovore sa HDZ-on,za da bi na kraju ispalo „ovo“ča je ispalo i iako se to tilo sakrit, od prvoga dana nije valjalo i sad je ka mijur od sapunjače najedan put puklo.

Eto i Domine,jema i ona ništo za reč-a ča ste se Vi uvatili bidnega Petrova,to su pravi ljudi za politiku,taki moredu u svakoga uprit prston i tražit ono šta je do sad u Hrvaskoj bilo nezamislivo,a to je ča je čelnik Petrov od početka govorija,da MOST u Hrvaskoj želi minjat političku kulturu i da su jin državni interesi na prvomen mistu i svaka jin čast u tomen su se za sada pokazali dosljedni,jesu u početku ka malo lutali,ali su sad, kad triba udrit šakon o stol,to i učinili.

E sad če vama vaša Domina reč ča nas čeka sljedeči misec,dva,tri,pet…daan.

Ako se u Saboru izglasa nepovjerenje prvomen 1. podpresjedniku vlade onda premijer Saboru predlaže niku drugu osobu,a vlada more i ne mora podnit ostavku,nego če se glasat za otu osobu i nastavit sa radon.
A ako inicijativa za opoziv premijera dođe od jedne petine zastupnikov i Sabor izglasa nepovjerenje,cila vlada daje ostavku i onda počimlje teč trideset daan za formiranje nove vlade koja onda kreče sa radon,a ako to ne uspijedu,onda presjednik Sabora o tomen obavještava presjednicu koja raspušta sabor i donosi odluku o raspisivanju prijevrimeni parlamentarni izbori.

Ili,ako premijer zatraži glasanje o povjerenju vladi i ono se ne izglasa vlada automaski pada pa se onda gre u nove izbore. A to oviman na vlasti trenutno nikomen ne odgovara.

Asti Domina,govoriš ka niki politolog,a kako ti to sve znaš?Ča politolog,ja san stručnjak,ma ča stručnjak,meštar,koji meštar,likar,akademik od politike san ja,jerbo su me više satrali po novinan,radijiman i televizijan,ma kako jin se više da izmišljat i činit konte ko bi sa kin moga, samo da ostanedu na vlasti.
A bidni,vidi koje podočnjake jemadu, da mi ji je vidit po noči ono kako se dižedu iz postelje i križaljke činidu ko če, kako če di če i može li oni sa onin ili je bolje bez njega,tako da sad valja i oni u kojega su se cilo vrime itali stinjan,a ovi če jin za koju lipu funkciju sve oprostit.

Evo opet Filomena jema ništo za reč-Ma ča se bojidu vratit mandate građaniman koji če ji siguro na izboriman opet izabrat,zar ne govoridu kako smo pripoznali njijov rad i reforme koje če izvuč zemlju iz krize,a ko more zaboravit ovo ča su u par miseci vlasti učinili i ča se još spremadu.

Pod jedan,nismo u London mogli unovčit obveznice upravo zbog nestabilne političke situacije koja je prisutna od samoga formiranja vlade.

Pod dva,uspili smo prodat Končara,jednu od ritki fabrik koja nan je još ostala,a koja se more dičit sa svojiman proizvodiman koje morete nač na svakomen kantunu ove naše Zemljine balote.

Pa su donili odluku da ko je naumija baš da ga likar na hitnu prigleda platit če sto i pedeset kuun.

Pa zaustavljanje kurikularne reforme,zbog koje je narod izaša vanka na ulicu,šta se zanji put dogodilo sredinon devedeseti godin kad su tili udunit stojedinicu.

Pa su tili ukinit financiranje prijevoza za srednjoškolce,ča je prolongirano za deveti misec?

Pa nas čeka prolongirano poskupljenje dopunskoga zdravstvenoga osiguranja,poreza na imovinu…

I sad ono najzanimljivije ča se more čut, kriv je npr. premijer Oreškovič ča se Končar proda.
A biče on jema koje uže koje kad je glasanje potegne i ruke se u nizu jedna za drugon same za glasanje dižedu?

Je li Filomena,evo na i Kate se javlja-A još mi u glavi rebunbaje oni Vaš Grčič-vječiti optimist koji nas je cilo vrime uvjerava kako oni dobro radidu i kako to mi ne vidimo,ali čemo osjetit kad nan takujini budedu puniji,ma je proša cili mandat otoj tvojoj vladi,a on je i oni zanji dan kad je kroza vrata od vlade izlazija, oto isto govorija.

Je Kate,ma je najpri tribalo oni nered ča su tvoji ostavili,dovest u red i evo,vidiš da nan več nikoliko kvartali BDP reste i to dokle nan je u vladi status quo i ča je najgore od svega,ako i budedu izbori,a nečedu,jer je svakomen drago bit u vlasti,opet če tribat za Van najpri čistit za da bi kako triba krenili.

Ma meni ništo nije jasno,ajde Marijeta reci i ti ča jemaš-A meni je više puna kapa karanja,nas malega svita zbog oni ča su gori,a koji su bili ka i mi doli i najedanput su na nas zaboravili i gledadu samo da njiman bude lipo i puna mi je kapa floskul o tomen kako državne interese triba stavit isprid privatni kad vidimo koje se sve makakade činidu kojiman se oto rečeno opovrgava,pa zar stvarno mislidu da smo mi „mali“ ovce?

A mi se sad ovde između sebe zbog nji karamo,a oni če se za da bi ostali na vlasti bez problema između sebe dogovorit,pa zar ne vidite da se i HDZ i SDP kad jin triba vrlo brzo između sebe usuglasidu,ali eto,još uvik jemamo kruva,a političari nan svakodnevno priređijedu svoje igre,a mi pljucamo po televizijan (bilo bi dobro kad bi ji činili sa brisačiman).

Nema veze,samo se vi zabavljajte,činite varijante i gimnastiku kako sve namistit za da Van bude dobro,nije priša,pomalo ima vrimena,najvažnije je da znamo da Vi to radi našega boljitka činite,pa je narodu odma lakše i bit blokiran i čekat na birou posal i radit,a ne primat plaču,čekat poštara koji če mu donit ovrhu koju ako ne bude platit priti pljenidba,lakše je podnit deložaciju i izač iz kuče koju če niko prodat za male pare kako bi namirija nekakav svoj dug itd.itd.

A reču van ja ča če na kraju, ako dođe stani pani ispast.Sa Karamarkon bi se moglo dogodit isto ono ka ča se dogodilo i sa bivšiman hdzovin predsjedniciman Sanaderon i Kosoricon.
Najpri bi se u stranci naša koko ča bi presjedniku-ci reka ča jema,a onda bi ga ovi drugi ispljucali,a kad bi se kolo razlaufalo,oni ča su branili svoga gazdu i pljucali na one ča bi ga kritizirali,sad uzimadu maja i vatadu pozicije na rezervniman položajiman tamo di bi se tili vidit u budučnosti kad se stvar iskristalizira.
Samo neznan zašto se sve ovoliko odugovlači?

A dobro si i ti Marijeta rekla,eto nji tamo,a neču se ja sa vaman zbog nji karat,kvragu i politika i ko je izmislija rekla je Filomena i svi su se u glas okolo toga složili,osin sa otin da bi izbore ča pri tribalo napravit,zašto je Kate,naravno,jedina bila protiv.