Sučurački livi i desni bakalar (III)

Datum:December 25, 2015 11:55 pm
Komentari
Komentiraj

Iša san da ču ništo napisat o ovogodišnjemu diljenju bakalara pa san se uvatija da ču se ponavljat,jerbo ča ču novega izmislit,izmišljadu oni ča jin ne paše istina,pa da bi je priokrenili nako kako njiman odgovara cilo vrime je navrčedu,isto ka da neznadu da je ovo mala sredina i da se sve zna ma kako se oni trudili oto izokrenit u njiovu korist,a i oni ča mislidu da se o njiman ništa nezna,jerbo su npr.iz nike druge sredine došli ovde stat,grdno se varadu i o njiman se isto tako zna,tako da ne mislidu kako su ovde došli ka anonimusi pa moredu okolo solit pamet.

E i pošto se svake godine to ponavlja ,onda je jedino ča ja sad ovde mogu najpametnije učinit, to, da ponovin ono ča san zanje dvi godine o livemu i desnomen bakalaru ovod pisa,jedino ča nije isto je ura jerbo je Matela ove godine sa diljenjen ovega desnoga bakalara počeja u jedanajst uri,lani uokolo podne manje kvarat,a oni livi ča ga je činija MO se ka i lani počeja dilit okolo deset uri.

2013. godina:

Danas je Sučuračka riva bila sva u vonjima o bakalara.Za razliku od prošli godin kad je Matela započeja sa diljenjen bakalara koji je več odavna posta tradicija koja se ne propušta,ove godine u organizaciji MO Sučurca isto se dilija bakalar. E, sad Sučurac nebi bija Sučurac da se i po pitanju okolo bakalara nisu napravile podjele. Bila je velika dilema kod koga se poč fatit je li na desnu oli livu bandu? Ako gre na desno,oče li se ovi livi najidit,a ako gre na livu bandu onda bi se ovi desni moga najidit,a jema oni diplomati ča su išli i na livu i na desnu bandu provat,a isto tako bilo je i oni ča bi se rado bili fatili,ma nisu znali di če pa su odlučili ne poč ni livo ni desno nego stat sa strane i mislit kako su se mudro izvukli. Aha kako nisu.

P.S. I nemojte Vi sad mislit ovo ča san ja pisa o livima i desnima da san to ka na politiku mislija,nije,nego jednostavno kad se spustiš niza Kajin brig i dođeš kraj starega kanpanela onda su oni ča su dilili bakalar s donje bande na livu ruku,a oni s gornje bande na desnu ruku. E.


2014. godina:

HM. E i kako sad to napisat pa da ispadne kako bi niko tija da bude,a ne nako kako je, jer ono prošle godine kad san pisa o livomen i desnomen bakalaru isto tako mogu i ove godine ponovit. A to ča bi niko volija da je on zamisto na livoj na onoj drugoj,desnoj bandi je njegova stvar,ma se protiv niki životni pravili nikako ne more,jer ako san se ja jučera na Badnjak isto ka i prošle godine na rivu spustija sa Kajinoga briga onda je oni bakalar od MO ča je doli uz rivu bija meni na livu bandu,a oni bakalar u Matele je bija na desnu bandu i to je to.Je da mi je jedan bija reka da neka se lipo spustin niza Novi put pa da bi mi tako Matelin bija na livu,a oni od MO-a na desnu bandu,a to je več nametanje na koji bi način ja triba, kako bi ja triba,šta bi ja triba…ča oče reč kad več ideš pisat onda mene pitaj kako češ to učinit, jer ono ča mi oti niko reče da triba učinit, je jedino ispravno kako to triba bit.

Za razliku od lani kad su se oba bakalara dilila u dvadesetak minuti razlike,ove godine se oni livi bakalar počeja dilit okolo deset uri i kad je sve bilo gotovo i mislilo se da od desnoga bakalara ove godine nima ništa tamo okolo podne manje deset eto Matele i vadi iz aute najpri fritule,pa boce vina pa jednu teču sa bilin bakalaron,pa drugu teču sa onin na brujet i najedan put se stvorila veeelika gužva jer su svi tili doč do otega Matelinoga bakalara za kojega več godinama govoridu da je za prste polizat.

P.S. I ča san ove godine čuja da se je lani dogodilo,a dogodilo se to da je vidilo jednoga kako čiri ko je sve doša jist oni desni bakalar,e vidiš i zato ka ča je to Luiđi reka u Malomen Mistu, volin ovo svoje selo di jema ovakvi pizdarij i nikad nije dosadno.
Negooo,čuja san i jednoga ča je iz jedne udruge reka,a reka je da je ovi livi bakalar učinjen od bakalara ča su ga donirale i pojedine udruge iz sela pa da mu nije jasno kako onda MO more bit organizator,kako onda nisu ka organizatori ili bar bakalar dilidu i oni ča su ga donirali??

Ovako je to bilo jučera:

Puni Misec za Božič

Datum:December 25, 2015
Slike 32396

Znate li kad je zadnji put za Božič bija puni Misec? 1977 godine. I evo,nakon trideset i osan godin i ovi Božič jemamo puni Misec,a sljedeči Božič kad če opet bit puni Misec bit če 2034-te godine.

Otvori ...

Božična čarolija u Sučurcu

Datum:December 21, 2015
Slike 34370

Sinoč je u našemu kinu održana humanitarna manifestacija pod nazivon Božična čarolija koju su Savez za Kaštila i Udruga Glazbeni talenti Music Talents iz Splita učinili za članove Udruge tjelesnih invalida Kaštila di su dobrovoljniman priloziman i kupovinon raznih radova članova društva posjetitelji mogli pomoč Udruzi. Bila je to večer za pamčenje di su dica ka pravi profesionalci otpivali pisme vezane za ovo predblagdansko vrime o Božiča,a scena kakva je…

Otvori ...

Dida Mraz u Sučuraškomen DVD-u Mladost

Datum:December 21, 2015
Slike 34202

Kako je to sinoč u vatrogasciman bilo najbolje govoridu lica od dičice,a i oni stariji,ali triba naglasit da je sve bilo na svomen mistu,ništa se nije pripustilo slučaju,a za ovo ča smo sinoč vidili tribalo je uložit puno,puuuno,puno vrimena.Bravo!

Otvori ...

I to samo u po ure

Datum:December 21, 2015
I to samo u po ure

Eno kako san nikidan ono bija meka da je oni ujutro okolo osan uri proša kraj škole zabranjenin smjeron i kako san prolazija selon zaustavljali su me i govorili,a da di ja stojin pa neznan da se tamo okolo škole cilo vrime promet odvija dvosmjerno? Ma je?je,je, poj tamo pa češ vidit. I ne bija ti ja lin,iša san po ure pri po malu u školu i evo ča je…

Otvori ...

Olinpijci na Spliskoj rivi

Datum:December 18, 2015
Slike 34054

Jučera je na Spliskoj rivi bija olinpijski studijo na otvorenomen di se uživo činija intervju sa Spliskin olinpijciman,ka i oniman ča su moguči kandidati za Olinpijske igre u Riju 2016 godine,a dica i prolaznici su sa njiman činili,a ča drugo nego selfije.E.

Otvori ...

Opet zabranjenin smjeron

Datum:December 17, 2015
Slike 34048_edited-1

Jutros je kraj Osnovne škole okolo osan manje pet opet jedna auta prošla odozdala prema gori,neka je to zabranjeni smjer. Ovo je več postala učestala pojava,ali do kad? Jeli rješenje ka ča je več ovde niko bija reka snimanje saobračaja tako da se iskoristi video sustav kojega ima škola,naravno,sa postavljenon tabelon kako je javna površina pod videjo nadzoron,ili, neko ima koje bolje rješenje? Bilo kako bilo,ali ništo triba ča pri…

Otvori ...

Klizalište u Spaladium areni

Datum:December 16, 2015
Klizalište u Spaladium areni

U Spaladium areni jučera je otvoreno klizalište. A ča se tiče klizači jema ji svakakve vele, od oni ča znadu klizat i vadidu mast oniman drugiman sa aksliman i piruetan,oni ča nemadu pojma,pa se pomažedu i rukan i nogan,oni ča ništo znadu,ali nisu odavna klizali pa pomalo lizu i pomažedu se pomoču ograde,a jema i oni ča se osokolidu,pa se neznadu zaustavit,a jema i oni ča mislidu da znadu,a nimadu…

Otvori ...

Jučera je bija Dan od otvoreni Kaštelanski konob

Datum:December 14, 2015
Slike 33815

Sve je počelo dolaskon četiri kara koja su se parkirala doli na rivu i fešta je u konobi od Matele mogla počet. Skupilo se tote puno oni iz sedme sile,blicavalo se,snimalo,pisalo ča to Ivan jema za reč,a on je to onako po svoju sve lipo pojednostavnija i reka da nije ovo ono industrijsko štrc-brc vino,več je ovo vino rađeno s ljubavlju i kako se ti sa njin ponašaš takvo če…

Otvori ...